PAGPAWONG sa signal sa cellular o mobile phone atol sa mga kalihukan sa Sinulog 2020 subling gihisgutan sa tigom sa Cebu City Police Office (CCPO) uban ang mga ahensya sa gobiyerno, kadagkoan sa Basilica Minore del Santo Niño ug uban pa kagahapon, Nobiyembre 29.
Ang representnte sa National Telecommunication Commisison (NTC) nipasalig nga ilang hatagan sa dinalian nga pagtagad ang hangyo sa kapulisan.
Usa sa ilang gihisgutan ang pagpatuman sa seguridad lakip na ang mga gidili sa Sinulog nga mahimo nila nga ipatuman sa kapulisan inabagan sa mga sundalo ug mga volunteers nga motabang sa pagbantay sa tibuok Sugbo.
Matod ni Police Colonel Giovanie Maines, officer-in- charge sa CCPO, mopadala silag rekomendasyon ngadto sa NTC alang na sa pagpawong sa signal sa cellular phone sa panahon lang nga adunay himuon nga dakong kalihukan nga may kalabutan sa sinulog.
Si NTC 7 director Jesus Laureno nitug-an sa Superbalita Cebu nga sama sa nanglabay nga mga Sinulog, ipaagi kini sa proseso sama sa suwat hangyo gikan sa Police Regional Office (PRO) 7 nga ipadala sa ilang ulohang buhatan diin ang ilang ahensya na ang mo tugot sa maong hangyo.
Matod ni Laureno nga dili na bag-o alang kanila ang pag pawong sa signal tungod ila na kining nahimo sa nanglabay nga mga kalihukan sa Sinulog ilabi na ang grand parade.
usa sa hugot nga pangandaman matod ni colonel maines ang dakong concert party nga himuon sa south road properties nga angayan nga hatagan nilag pagtagad tungod kay dako ang posibilidad nga tambongan kini sa daghang batan-on.
Ang pangulo sa peace safety and security sa Sinulog Foundation, INc. (SFI) Rev. Fher aladdin luzon mitug-an nga nakahan-ay na ang mga programa sa sinulog gani adunay kausaban sa rota sa solemn procession nga iya lang unya nga ibutyag sa mosunod nga mga adlaw.
Sama niadtong 2018 nga Sinulog atol sa pagbalhin sa imahen ni Santo Niño sa Saint jJseph Shrine sugdan ang misa alas 11 sa gabii sa dili pa kini dalhon sa simbahan saBirhen sa Regla sa Lapu-lapu.
Pagka alas 4:00 sa kaadlawon ang misa sa Birhen sa Regla ug pagka alas 5:30 sa buntag, dalhon na kini sa Naval Forces Centra alang sa seaborne prosession. (AYB)