NATANGGONG og dili mominos upat ka mga oras ang mga motorista sa Marcelo Fernan Bridge, dakbayan sa Lapu-Lapu kagahapon, Biyernes, Nobiyembre 29.
Kini human nga usa ka dumptruck nga gipanag-iya sa David Justine Construction nga nagbase sa lungsod sa Consolacion nga nasunog sa habig sa viaduct sa naasoyng taytayan.
Matod ni Mario Napole, pangulo sa City Traffic Management System (CTMS) sa Lapu-Lapu, ang dumptruck giingong nawad-an og brake samtang nagbiyahe kini sa taytayan gikan sa lungsod sa Consolacion paingon sa Lapu-Lapu area alas 2 :00 sa kaadlawon.
Gumikan kay wala nay mahimo ang drayber sa dumptruck, hayan iya na lang kini nga gibangga sa railings sa taytayan.
Apan human mabangga kalit nga misilaob ang dumptruck hinungdan sa pagkasunog sa duha ka ligid niini sa atubangan.
Dinhi na nagsugod ang suliran sa mga traffic personnel gumikan kay dili naman kini makadagan.
Nianang pagka alas 6:00 sa buntag nga maoy “rush hour” sa taytayan gumikan kay oras na kini sa pagpadulong sa trabaho ug eskwela sa mga trabahante ug estudyante hilabihan nang huota ang dagan sa trapiko sa taytayan gumikan sa nabara nga dumptruck.
Ang ubang mga motorista misuway og likay sa Marcelo Fernan Bridge ug miagi sa Mandaue-Mactan Bridge apan ang resulta napuno na usab ang taytayan ug sakyanan hinungdan nga mitaas usab ang buildup sa trapiko sa dapit.
Walay nahimo ang CTMS sa pagpadaplin sa dumptruck sanglit dili kini mabira sa ilang tow truck gumikan sa kabug-at niini.
Kargado ang dumptuck ug anapog ug dili na usab modagan ang atubangang ligid niini human masunog.
Igo na lang sa paghulat ang CTMS nga makuha ang dumptruck sa ilang kaugalingong heavy equipment.
Apan nilanat usab kini ug taas nga oras sanglit kinahanglan pang ibalhin ang kargang anapog sa dumptruck sa lain na usab nga dumptruck una kini gibira sa heavy equipment.
Mga pasado alas 7:00 na sa buntag nakuha ang ang dumptruck sa taytayan nga mao usay nakaluag-luag gamay sa dagan sa trapiko sa dapit.
“Alas 10 na lang grabe gihapon ang traffic, naa mi towing pero dili gyud makaya gyud. Daghan-daghan gyud tong na-late ato,” matod ni Napole.
Gibutyag ni Napole nga ang kakuwang sa heavy duty nga tow truck nga mobira ug dagkong sakyanan nga maaberya o magkaproblema sa taytayan maoy usa nakaingon sa nahitabong grabeng trapik.
Nunot niini, ilang suwayan og pamarayeg unya ang Mactan Cebu Bridge Management Board (MCBMB) nga mopalit og heavy duty towtruck aron kalikayan ang susamang insidente sa umaabot bahin sa pagkabara sa trapiko. (GCM)