NIHANGYO ang mga pari sa Basilica Minore Del Sto Niño de Cebu sa Cebu City Government nga tangtangon ang stalls nga nagpilit sa pader aron magamit ang lugar isip preparasyon sa pagsugod sa ika-455 nga Fiesta Señor.
Sila si Father Pacifico Nohara, Rector sa Basilica, Fiesta Señor overall chairman ug Father Ric Anthony Reyes, secretariat head, nipadala og suwat ngadto kang Mayor Edgardo Labella aron makuha ang stalls nga nahimutang sa dalan Jakosalem.
Si Labella nagkanayon nga wa pa niya mabasa ang suwat gikan sa Basilica ug mohatag siya og desisyon kon iyang mahibaw-an ang tibuok detalye.
Gusto sa mga pari nga hawanan ang lugar aron adto na molinya ang mga deboto ni Sr. Sto. Nino nga mohawok sa imahen.
Giasoy sa duha ka mga opisyal sa Basilica nga matag tuig diin magsingabot, mohimo sila og laing lane diin maghuwat sa ilang turno ang mga deboto nga makahimamat ug makahawok sa imahen sa Balaang Bata.
Matod pa ni Nohara nga matag Fiesta Señor, adunay mga exit area nga ilang himuong entrance para lang makasulod sa ilang marble chapel.
“We are eyeing that part of our peripheral fence at the near section of the Convent is the best solution to the said predicament. If we will make another emergency exit, which will now become a dedicated entrance every fiesta, this will solve our problem comes this Fiesta in 2020,” tipik sa suwat sa mga Agustinong pari penetsahan og Nobiyembre 19.
Si Basan Amora, kanhi presidente sa Sto. Niño Sidewalk Vendors Association, niingonnga mohangyo sila ni Labella nga di tugotan ang Basilica sa ilang gusto sanglit ang dapit nagsilbi nga relocation site human gi-demolish ang ilang stalls sa Osmena boulevard niadtong 2001.
Gipadayag ni Amora nga niadtong miaging buwan, ang ilang stall giputlan aron di na makabalda sa pedestrians nga moagi. (PAC)