GOOD day everyone! Happy 1st “Araw ng Purok 17” dinhi sa among dapit sa Barangay New Visayas, Panabo City!
Ugma na gayud ang tigianay sa pinakahinlo ug nindot nga dalan, apil ang kembot sa sayawan ug uban pa.
Congrats daan mga silingan! Giyahan unta sa Ginoo ang aktibidad ug pagpaningkamot nato - hallelujah!
Kumusta? Padayong nagpakahilum ning inyong higala kay gawas sa pisikal nga sakit, ang akong dughan naghigaus sa mga panghitabo sa life. Lisod gud, apan grasya ni Lord, ania “buhi” pa! Paytz gihapon, higala!
Nagsakit man tuod akong dughan apan mapasalamataon kaayo kay sa matag karon ug unya, makita nako ang giya sa Ginoo. Daghang sitwasyon nga ginapasabot kanako ang Kalangitan busa mas gipili nako ang pagpangita sa Iyang kabubut-on.
Tuod man, ang simpleng video sa YouTube nga giwali ni Pastor Joel Osteen sa Amerika, usa sa mga namulong sa akoang gubot nga panghunahuna. Ang iyang wali gitituluhag, “outlast” o “paglahutay” kon “paglungtad” sa atong pinulungan.
Iyang gisugid nga si Dabid nga nakapildi kay Golayat, wala ningsukol kay Haring Saul bisan ikapila siya gustong patyon niini. Hilabihang pangabugho ang gibati ni Haring Saul kang Dabid tungod sa iyang mga malampusong nabuhat.
Daghang oportunidad nga mahimong balusan o patyon ni Dabid si Haring Saul tungod sa mga dautang gibuhat kaniya, apan iyang girespeto si Haring Saul isip dinihugan sa Ginoo.
Usbon ko, wala nanimalos si Dabid. He outlasted Saul. Nagmalahutayon si Dabid. Nahimo siyang hari pod siyang hari sama ni Saul.
Like David, daghan pod kitang mga hagit sa kinabuhi. Usahay hangyuon nato ang langit nga kuhaon na lamang kita aron sulbad na ang problema. Kubalan na lang ang tuhod ug inampo, wala gihapon nausab ang atong mga sitwasyon.
Pero sama ni Dabid, magmalahutayon kita luyo sa atong mga kabalaka kay ang Diyos nakakita sa tanan. Sa hustong panahon, Siya magaplastar kanato.
Ang mga problema, posibleng panalangin sa Ginoo aron lig-unon ang atong pagtuo.
Maayo ang Diyos. Sa nindot o lisod nga sitwasyon, ang Diyos dili mobiya kanato, igsuon busa magmalahutayon kita. Gamay’ng panahon na lang... matagamtaman na nato ang alibyo ug mga panalangin nga alang gayud nato.
Let’s all endure. Kapit lang!