NASIKOP sa mga sakop sa Dalaguete Police Station, inabagan sa Alcoy Police Station ang usa ka magtutudlo sa high school sa lungsod sa Dalaguete, habagatang Sugbo, pasado alas 9 sa buntag, Nobiyembre 29, 2019 sa dalan Jose Rizal sa mao nga lungsod.
Ang suspek giila nga si Roy Osoio Ysao, 40, nagpuyo sa sitio Lalin, Barangay Poblacion, lungsod sa Dalaguete.
Nakuha gikan kaniya ang pito ka mga pakete sa gituohang shabu diin usa niini mao ang gipalit sa usa ka pulis.
Matod ni Police Corporal Gerson Alcantara, desk officer sa Dalaguete Police Station, nga gikan sa Alcoy ang impormasyon labot sa illegal nga negosyo ni Ysao.
Magtutudlo sa Dalaguete National High School si Ysao apan, nadungog na kini nga mogamit sa illegal nga drugas.
Si Police Lieutenant Henry Estoy, hepe sa Alcoy Police Station, nitug-an sa Superbalita Cebu nga niadtong nanglabay nga mga buwan adunay usa ka drug user ang ilang nadakpan nga nakuhaan og mga pinakete sa gituohang shabu.
Sa dihang ilang gipaubos sa imbestigasyon kon asa siya magkuhaan sa supply, iyang gitudlo si Ysao. Tungod sa impormasyon, ilang gilusad ang surveillance sulod sa tulo ka buwan kon unsa ka tinuod ang pamahayag sa dinakpan.
“Naa mi nadakpan diri nga drug user adtong milabayng buwan. Nya iyang gisulti namo nga didto siya magpalitan sa Dalaguete sa usa ka maestro. Mao to among gi-surveillance,” matod ni Estoy.
Uban sa Dalaguete Police Station, ilang gipalitan si Ysao. Sa dihang nasuta nga tinuod ang impormasyon, giplanohan dayon nila ang buy-bust operation.
Alas 9:30 kagahapon sa buntag, nilusad silag buy-bust operation nga niresulta sa pagkasikop ni Ysao.
Giangkon, matod pa ni Ysao, nga tiggamitan siya sa illegal nga drugas apan wa siya mamaligya. Igo lang niya nga gipaulian ang pito ka putos sa shabu aron aduna siyay ika sustiner sa iyang bisyo.
Tangtangan
Dili i-tolerate ug kuhaan og lisensya si Ysao kon mapamatud-an nga mamaligya og ginadiling drugas sa iyang mga estudyante, matod ni Department of Education (DepEd) acting Regional Director Salustiano Jimenez.
“As a regional director, we have to investigate this matter. Naa tay atong ipa imbestigar dayon didto kon unsa may administrative sanction sa iya. Kon tinuod man gani na, aw we will not tolerate that and we will deal it accordingly. Angay siya makuhaan og lisensya sa iyang gibuhat and we will do that,” matod ni Jimenez.
Sigon ni Jimenez nga ila usab sutaon ang mga estudyante kon unsa ang ilang kalambigitan kang Ysao ug ila usab imbestigahon kon unsa ka grabe ang kalapasan niini una pa silutan.
Dugang ni Jimenez nga duna silay gipahigayon nga drug test alang sa mga magtutudlo. Sagad mopailawom niini ang bag-ong mosulod pagka magtutudlo isip ilang rekisito sa pag-apply.