LAAK, Compostela Valley Province -- Ang labhunong purol ang hinungdan aron nga ihawon sa 78 anyos nga lolo ang 21 anyos nga ulitawo sulod sa simbahan sa Jesus Miracle Crusade Ministry sa Purok 1, Barangay Sisimon.
Ang krimen nahitabo buntag niadtong Lunes, Nobiyembre 25, dihang giadto sa suspek nga si Macario Burdios Tano, mag-uuma, ang biktima nga si Dennis Gubaton Nudalo nga miyembro sa choir sa maong simbahan ug gipatay pinaagi sa pagtigbas ug dunggab tumong sa nagkadaiyang bahin sa lawas.
Sa gihimong pakighinabi sa SuperBalita pinaagi sa selpon kang Police Staff Sergeant Roel Rico, imbestigador sa Laak Municipal Police Station, nasayran nga selos ang motibong nagpaluyo sa krimen.
“Kining suspek nagselos ni sa biktima dihang iyang nakit-an ang purol sa biktima nga nahisagol sa labhunon sa iyang asawa,” saysay ni Rico.
Gibutyag nga sa wala pa mahitabo ang krimen, ang 62 anyos nga asawa sa suspek miuli sa kaugalingon niining balay sa Purok 4 sa nahisgutang barangay sanglit buot na kining makigbulag sa suspek tungod matud pa sa pagkaseloso niini.
Ang suspek ug ang iyang asawa nagminyo dihang pareho na silang mga balo ug wa nay mga kabilinggan sa kinabuhi hinungdan nga ang asawa sa suspek adunay kaugalingong balay diin ang biktima nga kauban sab niya sa simbahan nahimo niyang silingan.
Sumala pa nga giapas sa suspek ang asawa aron suyuon nga mopauli sa ilang pinuy-anan, apan nakit-an sa suspek ang purol sa biktima nga atua sa mga labhunon sa asawa hinungdan nga miulbo ang kasuko ug giadto sa simbahan ang biktima ug gipatay.
Apan, hugot nga gibarugan sa 62 anyos nga asawa nga wa sila’y relasyon sa 21 anyos nga biktima.
Apan ang suspek, kinsa anaa sulod sa prisohan sa Laak Municipal Police Station, nibarog sab nga duna gayu’y relasyon ang iyang asawa ug ang batan-on nga iyang gipatay. (Dexter T. Visitacion)