ANG usa sa duha ka mga babayeng gipamusil patay sud lang sa lima ka mga oras sa Dakbayan sa Sugbo mao nay ikaupat nga sakop sa ilang pamilya nga gipatay sulod lang sa lima ka mga buwan.
Kapulisan nagtuo nga panimawos ang motibo sa pagpatay kang Vicenta Abaño, 40, niadtong Biyernes, alas 12:30 sa kaadlawon, Nobiyembre 29, 2019, sulod sa balay sa iyang kapuyo sa Sityo Missionaries, Barangay Suba, Dakbayan sa Sugbo.
Tinuon pa sa kapulisan kon ang pagpatay kaniya may kalambigitan ba sa iyang pagka asset.
Wa usab nila wad-a ang anggulo sa illegal drugs kay giingong manggamitay usab kini ug mamaligya.
Ang unang gipatay niadtong Hunyo 28, 2019 mao ang iyang amahan nga si kanhi Jagoliao barangay kapitan Alejandro Abaño ug kabanay nilang si Junrey Boc samtang nangatulog sa ilang balay sa Barangay Jagoliao, Getafe, Bohol.
Wa pa gani usa ka buwan nga milabay, gipusil patay ang igsuon ni Vicenta nga si Niñolito sulod sa iyang machine shop sa Barangay Pahina San Nicolas niadtong Hulyo 21, 2019.
Si Niñolito nagdumala sa Jagoliao Mangrove Farm. Si Vicenta ang kamaguwangan sa tulo ka mga managsuon.
Si Police Major Kenneth Paul Albotra, hepe sa San Nicolas Police nga nahinabi sa Superbalita Cebu, niingon nga wa nila wad-a ang posibilidad nga panimawos ang pagpatay kang Abaño sanglit kini nahimong asset sa nagkadaiyang mga unit sa anti illegal drugs sa kapulisan.
“Ang kining biktima (Abaño) bisan asa na lang daw mohatag og mga tawo nga namaligya. Ako gali duda nga nailhan na siya ug mao nang giplanohan,” matod ni Albotra sa Superbalita Cebu.
Si Abaño nihatag usab og mga ngan sa mga namaligya apan, duha lang ka higayon ug nangadakpan nila.
“Duna man ta mandatu sa amoa nga makaduha lang hatagan og atensiyon si bisan kinsa ang maghatag kanila og impormasyon aron walay motumaw nga isyu. Ang gilikayan man gud dinha basin og maalaan ug koneksiyon sa pulis ba,”dugang ni Albotra.
Ang kamatayon sa upat ka mga sakop sa banay nga Abaño wa pa masuta sa kapulisan kon konektado ba apan, ang pagpatay kanila managsama og mga sirkumstanya ug estilo.
Gisulod
Igo sa baba, liog ug ulo ang gikamatyan ni Vicenta human pusila sa tulo ka wa mailhing mga lalake.
Usa ang giingong ningsulod samtang duha ang lookout.
Si Police Chief Inspector Carlos Irizari, naghawid sa kaso, niingon nga gipusil si Abaño samtang diha sa lawak.
Dugang ni Irazari nga posibleng gigunitan si Abaño ug gipa um-um sa sumbohan sa armas ug dayon gipusil.
“Ang problema namo karon kay walay motug-an kon kinsa ang misulod. Duna man siguro apan, dili gyud motingog,” matod ni Irizari.
Gituohang gisundan si Abaño sa iyang pag-uli sanglit naka adto pa kini sa ilang estasyon ug nipahibawo nga ang iyang bana giingong gidala sa wala mailhing lalake.
Nahibaw-an sa kapulisan nga amahan diay sa iyang kapuyo ang nidala niini, di laing tawo.
“Niadto pa gali ni ganina sa estasyon ug mao nalang ni ang among nadawat nga gipatay na. Pero nahibal-an nako nga ang amahan diay sa iyang kapuyo ang nagkuha pero walay nakabalo kon asa,” matod ni Irizari.
Dugang pa ni Irizari nga posibleng maabtan pa unta nila ang mga killer apan, apan way nipahibawo kanila sa insidente.
Manikyurista gipatay
Nakaplagang patay ang usa ka babaye sa bakilid nga dalan sa Sityo Cambawog, Barangay Pulangbato, bukirang dapit sa siyudad sa Sugbo sa Biyernes mga pasado alas 5 sa buntag, Nobiyembre 29.
Si Police Corporal Michael Angelo Singson niila sa babaye nga si Mila Gabayan, 35, taga Sityo Candarong sa mao nga barangay.
Wa pay natumbok ang kapulisan kon kinsa ang mamumuno kay way saksi.
“Kana man gud alas 5:30 sa buntag paingon pa na hayag gikan sa ngitngit unya dili daghang tawo ang maglabayan nianang orasa sa dapit kon asa napalgan ang patay nga lawas ni Gabayan,” matod ni Singson.
Samtang ulo ug apapangig ang igo ni Gabayan gamit ang wa pa masuta nga kalibre sa armas.
Nasayran sa kapulisan nga on call nga manikyurista ug manghihilot sa ilang barangay si Gabayan.
Dugang ni Singson nga si Gabayan katapusan nga nakit-an naghatud og karne sa ilang silingan.
Gitan-aw ang personal grudge nga posibleng motibo sa pagpatay kang Gabayan.
Nabalaka
Naalarma na ang officer-in-charge sa Cebu City Police Office tungod sa sunodsunod nga patay sa dakbayan sa Sugbo ning nanglabay nga mga semana.
Matod ni Police Colonel Giovanie Maines nga iya nang gimandoan ang iyang mga chief of police nga sulbaron sa labing dali nga panahon ang maong mga krimen ug pasakaan og kaso ang responsabli.
Nipatawag usab siyag command conference aron makisayod sa dagan sa imbestigasyon sa mga kaso.
Ipasusi usab niya kon pila na ka mga kaso sa patay ang nahitabo sa Siyudad sa Sugbo sukad siya milingkod isip OIC sa CCPO.
“Not only this but yung series ng shooting incident. I will be giving instructions. I will be asking them why until now walang solution ang mga yan despite of my assessment. Eh, pwede namang i-follow up at maka pag-establish o ma so-solve naman yung kaso,” matod ni Maines.
Usa sa iyang mando ang pagsulbad sa kasong pagpatay ni Police Lieutenant Colonel Joie Yape.