TAWO lang ako
Ug way gahom sama sa Imong
Gahom, Ginuo!
Wa koy mahimo
Kon pasagdan lang ko nimo
Sa mga panulay ug demonyo
Nga pugsanong mosikdo nako
Ngadto sa kadautan
Matag hagtok sa mga gutlo.
Kinsa man ako
Kon mao kini ang Imong gusto?
Kon ang akong katarong
Sa demonyo na buntogon.
Tawo lang ako
Ug di ko takos Kanimo
Nga mohagit sa kapungot.
Iluom ko na lang ang pagping-it
Kay matuman man gayud
Ang Imong pagbuot dinhi sa yuta,
Maingon man sa Langit!