SA GAMAY pa ko nasinati ko ang kalinaw
Sa kinabuhing banikanhon bisan mingaw
Kay walay radyo ug walay telebisyon
Nga moagda nako pagbilar sa kagabhion.
Sila nga gitahasan sa Langit pag-alima nako
Nanugbong sa dakbayan gikan sa habagatan
Kay dinhi hayahay ang kinabuhi ug trabaho
Diin naghulat ang maayo nga kapalaran.
Midako ko nga nasuheto sa kinabuhi dinhi,
Sa lumbaanay sa mga tawong ilaga aron mabuhi
Ning nagkayamukat nga nataran sa dakbayan
Sentro sa kauswagan sa bag-ong buhilaman.
Nagkayamukat ang mga trapik sa kadalanan.
Sa aseras nag-ali mga saydwok nga tindahan.
Ang katawhan wala nay hapsay nga kaagian.
Kon may pako pa sila molupad na sa kahanginan.
Kulba ang larok nga kagabhion sa dakbayan.
Nahimong natad sa krimen ug buhat nga dautan.
Mga pulis ug mga ‘drug pusher’ nagpinusilay
Apan mga durugista wa pa mahurot og kamatay.
Bisan nagkayamukat ang mga butang sa dakbayan
Dili na lang ko mobalik sa banika diin ako gikan.
Nakagamot na ang akong mga tunob ning dapita
Ug mabungahon ang kinabuhi sa akong pamilya.