NAKIGHINABI ko og pipila ka sakop sa atong kapulisan gahapon sa dihang nibuto ang balita labot sa pag-ulbo sa granada didto sa lungsod sa Initao, Misamis Oriental.
Sa video sa facebook nga among gisaw-an nagkadaiyang reaction ang aķong nabati gikan sa mga pulis.
Dunay niingon nga mao ni ang dakong risgo sa ilang propesyon nga mokalit lang og abot diha sa panerbisyo.
Sa video makita ang kaguliyang sa mga tinun-an uban sa ilang mga magtutudlo human makita ang presensiya sa usa ka tawo nga nagbitbit og granada.
Giila siya nga si Ibrahim Bashier. Sa usa ka bahin sa eskwelahan makita ang pipila ka tinun-an nga nisuway og duol sa maong armadong tawo.
Gihulagway kini nga armed and dangerous tungod sa itang dala nga granada. Hangtod nga niabot ang niresponding mga pulis. Usa na niini mao si Police Master Sargeant Jason Magno.
Mao ni siya ang nakita sa video nga nisuway og ilog sa granada gikan ni Bashier. Ang sunod nga eksena mao ang kusog nga buto human matagak ang granada. Patay si Magno ug si Bashier.
Naangol ang daghang estudyante. Saludo ko sa kaisog ni Master Sgt. Magno. Di sayon ang iyang gibuhat. Gisugal niya ang iyang kinabuhi aron malikay sa daking peligro ang mga tinun-an. Kong wa masanta ni Magno ang gibuhat ni Bashier pila kaha ka kinabuhi ang makalas kong nalabay ang granada ngadto sa mga tinun-an?
Saludo ko sa imong gibuhat PMS Jason Magno. Ang mga pulis nga akong nahinabi niingon nga usa ka bayanihong buhat ang gihimo ni Magno.
Ilang gihulagway nga sa maong sitwasyon dinalian nga aksiyon ang gikinahanglan sama sa gibuhat ni Magno.
Armed and dangerous ang imong girespondihan sud sa eskwelahan. Basi sa video di nako masabtan ang presensiya sa daghang tinun-an nga di layo sa tawo nga nagbitbit og granada.
Nakahibalo ba sila nga granada ang gibitbit ni Bashier? Nagpadayon pa hinuon ang imbestigasyon labot niini.
Kong maghisgut ta og rules of engagement lain lain ang paagi ang ipatuman pahaum sa sitwasyon. Sa giingon ko na lahi ang sitwasyon gahapon kay granada ang gibitbit sa subject.
Lahi sab ang taktika nga ipatuman kong may hostage crisis ang alarma. Lahi sab ang diskarte kong girespondigan tawo nga nagtion og armas sa iyang ulo.
Makadaghan nako nga maka kuyog og ingon niini nga alarma mga girespondigan sa mga pulis. May higayon nga nilampos ang mga pulis sa pagneutralize.
Duna say alarma nga pakyas sila kay gikablit man gyud ang gato sa way pagduha duha. Taliwala sa nahitabo sa Initao College, mangutana ta DepEd ug Ched kumusta man ang atong mga tunghaan? Sa akong nakita di basta basta mosud sa atong mga kolihiyo apil na ang mga tunghaan sa high school og elementarya mapribado man o publiko dinhi sa ato.
Sa mga lungsod estrikto ba sab sila? Ang mga eskwelahan nga nahimutang sa mga hilit nga dapit?