MISANGKO sa kinihi-ay kining mainiton nga kasungi-an ni Cebu City councilor Prisca Nina Mabatid batok sa duha niya ka mga kauban sa Partido Barug nga sila si kanhi konsehal Pastor Alcover ug kanhi Apas barangay kapitan Ramil Ayuman.
Kini sila si Ayuman ug Alcover kinsa pulos nangapukan sa niaging piniliay, ang mipasangil nga ang ilang kapildihan nagagumikan sa binuhatan ni Mabatid diin gipang-junk kuno sila atol sa ilang kampanya.
Pinaagi sa social media nagsinukliay og mga mahait nga pulong ang matag habig nga nagpahungaw sa ilang mga kasagmuyo bisan og milabay na pipila ka buwan ang eleksiyon.
Ning miaging mga buwan, nahilom ang kasikas ug gani dihay mga huhungihong nga daw sa hinayhinay nang nagkauli-ay sa ilang maayong kabubut-on ang matag habig.
Pero unsa ba diayng pagkaunsaa nga niadtong Huwebes, Nobiyembre 28, mipasaka man og kasong libelo si Mabatid batok ni Ayuman ug Alcover.
Kini tungod kay gipasanginlan siya nga misuway pagmaniubra nga ma-settle ang kaso nga sexual harassment ni kanhi Camputhaw barangay captain Lorenzo Basamot nga gipasaka sa tulo ka mga City Hall employees.
Sa ato pa, nag-umido pa diay gihapon ang kalagot ni Alcover ug Ayuman ngadto ni Mabatid ug daw sa wala pa gyud diay sila maka move-on hangtod karon.
Kining nagpadayon nilang panagbingkil naghatag lang kini og bating lama sa liderato sa Partido Barug kay wala man mahatagig kahusayan kining taodtaod nang problema sa ilang grupo.
Hinuon dili bag-o kining panagbingkil sulod sa maong partido kay mismo ang ilang mga lider nga sila si Mayor Edgar Labella ug vice-mayor Mike Rama aduna man usay kasungi-an.
Mao kini timaan sa ilang pagkasi-ak ugma damlag.