DUGANG mga armas nga way mga lisensya gipangtahan sa mga lumolupyo sa bukirang mga barangay sa Dakbayan sa Sugbo ngadto sa City Mobile Force Company sa Cebu City Police Office atol sa gilusad nilang Oplan Magnum.
Moabot ngadto sa 40 ka tag-as ug mugbo nga mga armas ang nakuha sa kapulisan nga gipangulohan ni Police Lieutenant Colonel Randy Korret.
Ang mga armas nga walay lisensya nga gitahan naglangkob sa upat ka mga .30 calibre bolt sniper rifle, 17 ka .38 caliber revolver, tulo ka .22 caliber rifle, duha ka 30 US M1 Carbine rifle, duha ka improvised shotgun, usa ka 12 gauge shotgun, duha ka .45 caliber pistol, tulo ka kalibre 5.56 revolver, usa ka ka .357 revolver, tulo ka kalibre .22 revolver, usa ka 9mm pistol ug usa ka unit sa kalibre .22 revolver.
Lakip sa gitahan ang usa ka rifle grenade ug usa ka hand grenade ug mga bala sa nagkadaiyang kalibre sa armas.
Matod ni Police Lieutenant Colonel Randy Korret, hepe sa City Mobile Force Company, nga ang mga residente nga ningtahan sa mao nga mga armas nagagikan sa 10 ka mga barangay sa bukid.
Kini mao ang Barangay Sinsin, Sudlon 1, Sudlon 2, Buot-taop, Pamutan, Toong, Buhisan, Sapangdaku, Bonbon ug Guadalupe.
Nahibaw-an nila ang mga indibidwal nga adunay mga armas nga gipangtagoan sa ilang tagsa-tagsa ka mga barangay pinaagi sa ilang intelligence monitoring.
Nakigsulti si Korret sa mga residente sa maong mga barangay nga ipangtahan kini nunot sa nagkaduol nga Pasko ug Bag-ong Tuig, ingon man Sinulog 2020.
“Yan yung proactive measure namin bilang pagsagot doon sa maraming shooting incidents sa Cebu City at malapit na ang Christmas at New Year para mapigilan natin ang pagpapaputok nila,” matod ni Korret.
Nagsugod na usab silag bisita sa mga balay sa kinapusorang bahin sa Siyudad sa Sugbo nga adunay tinagoan nga armas nga way lisensya.