ORMOC CITY, Leyte -- Andam na ang Dakbayan sa Ormoc sa posibleng epekto sa Bagyong Tisoy nga misud sa Philippine Area of Responsibility (PAR), alas 4 sa hapon, Sabado, Nobiyembre 30, 2019.
Ang Ormoc City Disaster Risk Reduction and Management Council (CDRRMC) nihimo na sa ilang Pre-Disaster Risk Assessment alawng Biyernes, Nobiyembre 29.
Sa 48 ka miyembro sa CDRRMC, 30 niini ang mitambong ug gideklara ang Quorum.
Base sa Community-based Monitoring System (CBMS) ang dakbayan dunay 91 ka barangay nga posibleng maapektuhan sa pagbaha, 12 ang storm surge-prone barangays ug 57 ang landslide land slide prone barangays.
Naka-standby na usab ang tanan nga personnel sa CDRRMO ug nakaandam na ang tanan nga ekipo diin gahapon pa lang gipaubos na sa blue alert ang dakbayan.
Samtang ang Liga ng mga Barangay padayon nga magmonitor sa command center ug giabisohan ang mga barangay nga pabiling alerto.
Ang Department of Education nakaandam na usab sa ilang mga classrooms kon ugaling duna'y mamakwit.
Ang Ormoc Waterworks System nakaandam na usab sa ilang stationary ug mobile generator sets.
Ang General Services Office (GSO) dunay naka-standby nga duha ka 4x4 nga sakyanan ug pito ka 4x2 nga sakyanan ug gipangputlan na usab nila ang mga kahoy nga duol sa mga power lines.
Giabli usab sa GSO ang ilang mga fuel stations.
Ang ubang mga opisina sa local government unit (LGU) misumiter na usab og listahan sa ilang mga sakyanan ug drayber ngadto sa CDRRMO nga posibleng magamit sa emerhensya.
Naka-standby na usab ang kapulisan ug mga ekipo sa Ormoc City Police Office ug andam na sa pagresponde.
Ang Civil Security Unit mao usab ang gitahasan sa pagbantay sa mga opisina ug mga gamit sa LGU ug giabisohan mga magdala nalang og pagkaon ug mga gikinahanglan aron di na manghawa sa ilang pwesto.
Ang City Agriculture Office dunay naka standby ka upat nga traktora ug mao na mohatud og advisories sa mga mag-uuma.
Ang City Veterinary Office dunay naka standby nga tulo ka sakyanan ug mga dryaber ug nakig alayon sa Agriculture Office para sa livestock safety.
Ang Public Affairs, Information and Assistance Division duna na usab naka-standby nga sakyanan ug drayber ug sila ang gitahasan sa paghatud sa mga advisories sa mga establismento sama sa mga mall.
Samtang ang City Tourism mikanselar sa mga city tour.
Naka-standby na usab ang mga medisina sa City Health ug Radio Communication Equipment ug dunay mga on call personnel.
Ang City Social Welfare and Development duna usab naka standby nga mga kawani ug drayber, duna na usab 1,500 relief packs nga naka-prepositioned ug laing 500 ka relief packs nga naa sa warehouse sa supplier.
Ang Leyte Electric Cooperative duna usab tulo ka fuel tanks diin 15,000 liters ang capacity niini ug duna usan naka standby nga Quick Response Team Repair Crew.
Naka-standby na usab ang mga ekipo ug personnel sa Philippine Coast Guard.
Ang Philippine Ports Authority mao usab ang mohatag og update sa mga biyahe sa barko ug fastcraft.
Ang 803rd Maritime Police Station may naka standby na usab nga inflatable boat ug maoy mag abiso sa mga mananagat sa di paglawig.
Naka-standby na usab ang mga personnel ug ekipo sa Department of Public Works and Highways ug dunay command post sa ilang opisina.
Ang City Engineering dunay naka-standby nga upat ka dumptruck, usa ka boomtruck ug napulo ka service vehicle.
Samtang ang Department of Trade and Industry padayon nga magmonitor sa presyo sa mga basic commodities ug supplies. (JKDP)