SIKOP ang usa ka kanhi Overseas Filipino Worker (OFW) human nga gihulga nga ipakatag ang hubo nga hulagway sa dalaga kung dili kini makig-sex niadtong Nobyimbre 27 mga alas 3 sa kaadlawon.
Sikop si Jecky Michael Angelo Cailing, 29, ulitawo, taga Manolo Fortich, Bukidnon tungod sa kasong sextortion human gisumbong sa 21 anyos nga dalaga ug usa ka wedding planner nga taga Agusan del Norte.
Sa impormasiyon gikan sa kapulisan sa Police Regional Office-Northern Mindanao giingong gihulga ni Cailing ang dalaga nga ipakatag ang iyang hubo nga mga hulagway kung dili kini makipag-sex.
Daling nagpahigayon ang kapulisan og entrapment operation rason nga nasikop si Cailing ug narekober ang usa ka Huawei Mate 20 nga kolor dark green.
Giandam na ang kasong violation sa article 294 sa RPC o Robbery extortion, section 6 sa RA 10175 o cybercrime prevention act of 2012 ug RA no. 9995 o photo and video voyeurism act of 2009.