GIBUTYAG sa Task Force Oro nga walay nadawatang hulga sa seguridad ang siyudad ilabi na sa nagkaduol nga kasaulogan sa pasko.
Apan giklaro ni Major Anshary Pumbaya, kumander sa Task Force Oro nga dili angaya magkumpiyansa ang katawhan ug gani padayon ang ilang paghatag og seguridad sa dakbayan.
“So far wala tay angayang kabalak-an nga makahatag og kakurat sa atong katilingban pero dili lang lamang kita mokumpiyansa, mao gani kung makita ninyo atong kasundalohan, atong kapulisan naa sa kadalanan, naa sa mga checkpoint naghatag sila og seguridad,matud ni Pumbaya.
Naghangyo usab kini sa katawhan nga sabton ang ilang gihimo ilabi na diha sa mga checkpoints tungod kay alang lamang kini sa kaluwasan sa tanan.
Naghangyo usab kini sa kooperasiyon sa katawhan nga itaho gyud dayon kung duna man silay mamatikdan nga kadudahan.
“Dili lang pud ta mag kumpiyansa ug mangayo lang pud mi og kooperasiyon sa atong mga igsoon kung naa silay mabantayan nga unfamiliar things or suspicious things ilang ireport sa buhatan sa PNP or buhatan sa Task Force Oro,” dugang niini.