GIPAKITA ang panaghiusa sa nagkadaiyang sektor atol sa gipahigayong “Mindanao Week of Peace” nga gisugdan pinaagi sa “walk for peace” sugod Nobiyembre 28 hangtod sa Disyembre 4.
Nagbaklay alang sa kalinaw ang mga membro sa interfaith forum for peace, harmony and solidarity dinhi sa rehiyon gikan sa Rotunda paingon sa Kiosko, Kagawasan, Divisoria ning siyudad sa Cagayan de Oro.
Gibutyag ni Edris Salic sa Muslim Community ug usa ka peace advocate nga kini tinuig nga kalihokan ug aron ipakita nga nagkahiusa ang mga Muslim, Kristiyano, Lumad ug uban pa alang sa kalinaw.
“Ito ay ating ginagawa taon-taon, ipinapakita natin sa lahat na ang mga Muslim, ang mga Kristiyano o ang mga taong naniniwala sa ibat-ibang relihiyon hindi hadlang ang ating kultura, relihiyon o anumang paniniwala upang tayo ay hindi magkaroon ng pagkakaisa,” matud ni Salic.
Gidugang pa nga pinaagi niini nga kalihokan mapakita nga dili babag ang relihiyon aron magkahiusa ug makab-ot ang tinuod nga kalinaw.
Samtang gibutyag usab ni Major Anshary Pumbaya, kumander sa Task Force Oro nga pinaagi niini makita ang panaghiusa sa tanan.
“Nakita nato ang panaghiusa sa mga muslims, christians, lumad, ang tanan nga walay kagubot, atong gipangita ang kahusay ug kalinaw,” matud ni Pumbaya.
Gidugang pa nga makitang daghan na ang nisuporta niini nga kalihokan.
Magpahigayon usab og “arts for peace”, concert for peace, peace dialogue, forum ug konsultasiyon.
Nanawagan usab kini sa tibuok katawhan nga magtinabangay ug magsinabtanay aron nga hingpit na nga makab-ot ang kalinaw.