DAKPAN ang kanhi pulis ug laing tulo ka mga babaye sa usa ka drug bust nga gilusad sa mga personahe sa Iligan City Police Station (ICPS) 4 uban sa pwersa RMFB 10, 1005th Maneuver Company niadtong November 28, sa Purok 7B Barangay Tambacan, Iligan City.
Sikop sa operasyon ang gikonsiderang anaa sa drugs watch list nga mao si Catherine S. Taba, 33, taga Saray susamang siyudad.
Sikop usab si Eva B. Rivelo, 33 ug Melody Artiaga, 33, kinsa kanhi pulis human gi-dismiss sa serbisyo tungod sa absences without leave (Awol) status ug kanhi nadestino sa Barmm.
Matud ni Police Major Abogado Mautin ang Station Commander sa ICPS4 nga nag-operate ang grupo aron sikupon ang target nga si Taba human positibong napalitan og ginadili nga druga gikan sa suspek.
Sila Rivelo ug Artiaga miabot sa area sakay sa motorsiklo ug giingong mipalit na sa gidudahang shabu ngadto sa suspek.
Dinhi nakumpiska ang unom ka dayag nga sachet sa gituohang shabu samtang usa ka pakete nakuha sa posisyon sa kanhi pulis nga napalit gikan kang Taba.
Ang tulo ka dinakpan detinado na sa ICPS 4 kinsa gitakdang pasakaan og kasong kasupakan sa RA 9165 kon Dangerous Drugs Act.
Ang mga nakumpiskang illegal nga druga gitakda sab nga dalahon sa PNP crime laboratory alang sa masusing pag eksamin.