Compio: Disyembre Uno

MAAYONG adlaw nga Dominggo sa tanan! Manghinaut ako nga ang grasya sa atong Labaw’ng Makagagahom ug ang kalinaw, maanaa kanatong tanang ning unang adlaw sa Disyembre mga higala. Disyembre Uno!

Dili na gyud mapugngan, nga diha sa atong tagsa-tagsa ka mga kasingkasing, ang diwa na gayod sa Pasko ang mipatigbabaw, di ba husto ko?

Pipila ka adlaw gikan karon, magsunod-sunod na og sulod sa ATM card ang 14th Month pay nga bunos, naa sab mga good health bunos ug ang regalo sa mga kabanay nga toa sa abroad, ihulog naman lang sa ATM ang cash gift. Oy mora’g adunahan ang “peg” (ang drama).

Ops, kabalo nata sa batasan natong mga Pinoy, kung dunay ubay-ubay nga sapi, na hala, gasto diri, gasto didto, walay preno ang pag-gasto, basta naa pa ang kuwarta, hala gasto, paghurot na, hala minghoy, -- ug kini na sab ang sinugdanan nga molihok kita, maningkamot.

Hinay-hinay lang sa paggasto ning mga semanaha, kay basin unya pag-abot sa Pasko ug Bag-ong tuig, titoka ang peg nato Mareng, Pareng!

Makadani baya gyod ang mga “sale” karon sa mga Malls, busa isip-isip gayod, di kaayo pataka og gasto, “wisely” ang kinahanglan hunahunaon pag-ayo, di kaayo pataka og buryong sa kuwarta. Giingon nga ang usa sa mga sekreto niini mao ang di mopalit og mga butang nga dunay alternatibo ug di kaayo gikinahanglan.

Sa mga Christmas decors, mas maayong ibalik ang mga ginamit na sa milabay nga tuig, pagpagan lang gud aron mawala ang abog. Praktikalay daw karong panahona, Besh!

Lami kaayo paminawon ug mabati mga higala nga sa pag-sugat sa Bag-ong Tuig, daghan tag sapi sa bulsa ug sa ATM. Unya sa unahan, diha sa pagsugod sa mga semana sa Enero, hinay-hinayan na nato kana og gasto samtang gapaabot na sab sa sunod sweldo ug sa moabot nga grasya bunga sa pagpaningkamot.

Apan ning panahona, di gyod madala og praktikalay nga iagi lang sa pag-amin diha sa atong mga kinugos. Mo-greet baya na sila dayon sa messenger og “Ninong, Ninang Merry Christmas, akong regalo”, hahaha, butang nga hatagan sab nato og gamay nga budget.

Naay mga Ninong ug Ninang baya nga tapulan, mohatag nalang og kuwarta sa kinugos kay kapuyan na mopili og regalo kay dagko naman, mao nang perte sab lipaya sa mga inanak.

Sa laktud, ang sekreto nga di gyud mahutdan og sapi ning Pasko ug Bag-ong Tuig, ang di magpatuyang sa paggasto sa mga bunos nga madawat ning semanaha, kung naay utang, na hala, hinay-hinayan, di sab seguro ihurot og bayad, hangyuon lang.

Kanatong tanan, Malipayong Pasko, ug Mabungahong Bag-ong Tuig!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph