NAWAD-AN man tuod sila og usa ka tirador sa gawas sa pagkaangol sa Sugbuanong si Roger Pogoy apan masaligon si Gilas Pilipinas coach Tim Cone nga dili siya makuwangan og mga hinigo sa ilang kampanya sa Southeast Asian Games.
“We can still put a really good shooting team out there if we want to. And, we’ve still got a lot of versatility in our line-up. Point guards are really strong. So we feel good about where we are,” batbat ni Cone sa PBA.PH.
Malaumon si Cone nga mamuntos sa gawas sila si LA Tenorio, Marcio Lassiter, Matthew Wright, Stanley Pringle, ug Troy Rosario.
Si Pogoy nakasinati og angol sa iyang likod atol sa quarter-finals nga duwa sa Talk N’ Text KaTropa batok sa Magnolia Ang Pambansang Manok Hotshots sa Philippine Basketball Association (PBA) Governor’s Cup.
Mao kini ang hinungdan nga natangtang si Pogoy sa Final 12 sa Gilas Plipinas.
Sa kasamtangan, wala pa nakadedisyon si Cone kon kinsa ang iyang kuhaon nga ipuli alang kang Pogoy.
Tulo ka mga sakop sa Brgy. Ginebra Gin Kings nga sila si Greg Slaughter, Art Dela Cruz ug Scottie Thompson ang posibleng mopuli ni Pogoy. (ESL)