GOVERNOR Generoso, Davao Oriental -- Manhunt operation ang gihimo sa GovGen Municipal Police Station batok sa igsuong lalaki nga nanunggab human nag-away kay dili na mopalit og ilimnon.
Ang insidente nahitabo alas 9 sa gabii niadtong Miyerkules, Nobyembre 27, sa P-3 Barangay Manuel Roxas sa maong lungsod.
Nailhan ang biktima nga si Zepreano (bansagon gitago), 35-anyos, laborer ug residente sa Sitio Maitom P-3, Barangay Manuel Roxas samtang ang suspek mao ra sab ang iyang manghod nga lalaki nga si Lodi, 30-anyos.
Nasayran nga nalingaw og tagay og ilimnong makahubog ang duha, diin misangko sa ilang panaglalis dihang nangahubog ug nahurot na ang ilang tagay.
Sa impormasyon nga nakalap sa Superbalita gikan sa kasaligan nga impormante, gusto suma pa sa duha nga magpadayon sa tagay apan, nagtunukloray na sila kung kinsay mopalit og tagay ug nadugangan pa kini sa ilang daan nga bikil.
Padayon silang nagmagahi hinungdan nga naglalis sila ug gibuak sa suspek ang botelya sa Tanduay dayong gidunggab sa biktima.
Nakahiagom og mga samad sa kalawasan ang biktima kinsa gidali pagdala ngadto sa ospital samtang ang suspek daling misibat.
Sa impormasyon gikan sa GovGen MPS wala pa masikop ang suspek luyo sa ilang gihimo nga manhunt operation.
Hinuon, luwas na ang biktima kinsa gidala sa Davao Regional Hospital sa Tagum City.