NAKADAWAT og cash ug certificate of recognition ang usa ka Naval Architecture Topnotcher nga si Raymond Espina, lumad nga taga Barangay Poblacion, Dakbayan sa Lapu-Lapu, gikan ni Kongresista Paz Radaza.
Si Espina nahimong Top 8 sa di pa lang dugay nga Naval Architecture Examination niadtong Oktubre.
Usa usab siya ka benepisyaryo sa Eskolar sa Kaugmaon, usa ka educational program panahon ni Kongresista Aileen Radaza ug napadayon sa panahon dihang mayor pa ang inahan niining si Kongresista Paz.
Dihang mayor pa si Radaza niadtong 2017, gi-turnover ang Eskolar sa Kaugmaon ngadto sa Siyudad gikan sa buhatan sa iyang anak nga mao pay kongresista niadtong tungora.
Personal nga mi-congratulate si Radaza ngadto kang Espina human masayod nga usa kini sa naapil sa mga topnotcher.
Malipayon si Radaza sa dungog nga gihatag ni Espina di lang sa iyang pamilya kun dili sa tibuok dakbayan human nga naapil sa topnotcher. (GCM)