KAGULIYANG sa komunikasyon, kagubot sa pakig-alayon sa nagkadaiyang ahensiya ug kakuwangan sa gamit o gear sa mga rescuer, ang pipila sa nabantayan atol sa labing unang Sea Crash Rescue Exercise (SeaCRex) 2019 sa Mactan-Cebu International Airport (MCIA) niadtong Biyernes, Nobiyembre 29 nga gipahigayon sa kadagatan sa Magellan’s Bay area, Sityo Takan, Barangay Ibo, Lapu-Lapu City.
Mapasigarbuhon nga gipahibawo ni Atty. Steve Dicdican, MCIA general manager, nga ang tugpahanan sa Mactan mao pay nakapahigayon sa SeaCRex tali sa ubang airport sa nasud.
Matod ni Dicdican nga importante nga mopa-ubos sa SeaCRex ang ubang tugpahanan sa nasud kay taas ang chances nga mahitbo nga adunay abyon nga mo-crash land sa kadagatan, ilabi na nga sagad sa mga airport nahimutang duol sa dagat.
Ang Magellan’s Bay area sa Barangay Ibo diin gihimo ang rescue exercise nag-atubang sa runway sa MCIA.
Gihangop nila ni Dicdican ingon man sa chief operations advisor sa GMR Megawide Cebu Airport Corp. (GMCAC) Michael Lenane ang nabantayan nga sipyat ug kakuwangan atol sa kalihokan aron mahatagan og epektibo nga solusyon.
“That is why we called this simulation, so that we can assess and do better,” matod ni Dicdican.
“That is the purpose of an exercise. You want things to go wrong so you will know what to correct. So then, you will be ready of an event if it happens,” pasabot sa Irish national nga si Lenane.
Nagkanayon si Dicdican nga padayon silang mopahigayon sa susamang drill aron mabansay pag-ayo ang mga rescuer ingon man mahatagan og haom nga equipment. Nilanat og mga buwan ang training sa airport rescue team nga gilangkuban sa mga pulis, firefighter ug uban pa ubos sa pagdumala sa Philippine Coast Guard ilabi na ang paglangoy og 1.6 mile nga gilay-on sa dagat sa Barangay Ibo.
Samtang si Lenane sa iyang bahin, ang GMCAC ug MCIA magpadayon sa ilang close coordination ingon man ang paghatag sa gikinahanglang facilities nga dako kaayo og gamit sa higayon nga adunay katalagman nga mahitabo.
Ang GMCAC mitagana og lawak diha sa airport ug media center, reunion area sa biktima ug ilang pamilya, survivor’s center, ug uban pa.
Kabahin sab kini sa pagtuman sa International Civil Aviation Organization (ICAO) Standards and Recommended Practices.
Ang rescue drill mahitungod sa abyon nga nagkarga og 126 ka mga pasahero ug crew nga nakasinate og mechanical problem sa dihang motugpa na unta sa runway apan wa na maka-abot ug didto sa dagat nahagsa. (FVQ)