NAGKASABOT sila si Cesar, Gumer ug Badok nga manaygon nianang gabii sa Pasko. Giandam na ni Gumer ang iyang gitara ug iya nang giangay ang mga kuwerdas niini aron manindot gyud ang pagduyog unya niya kon manaygon na sila. Si Gumer dunay talento ug hilig sa musika. Ngilngig kaayo siyang mokinablit sa iyang gitara ug bisan unsang matanga sa pagkaskas kamao siya: plucking, strumming ug picking. Hawod sa sista si Gumer. Apan kuwang silag usa. Nindot man gyud nga upat sila nga manganta, labi nag babaye ang ikaupat. Nindot paminawon ang tingog sa usa ka babaye panahon sa sayo o lawom nang gabii.
“Swerte kaayo ta ron, Gum, kay miboluntaryo si Lily,” matod ni Cesar nga nagpahiyom. Ang tinuod, naibog kaayo siya kang Lily sukad pa kaniadto sa elemtarya pa sila. Karon nga hayiskol na sila, kisamot ang iyang kaibog sa dalaga. Guwapa si Lily ug nindot kaayog lawas ug may talento sab sa pag-awit kay kadaghan na kini makadaog sa ‘amateur singing contest.’
“Hmmm. Segurado ka, Sar, sa imong gisulti?” ni Badok nga kalma kaayong nagpakisayod. Sama kang Cesar, siya music-minded sab. Mahiugmaon siya sa mga awit nga Binisaya. Iyang idolo sila Max Surban, Yoyoy Villame, Serge dela Pena ug Al Comendador. Sama sa duha niya ka higala, hilom sab siyang nahigugma kang Lily. Masingo na unya niya ang kahumot sa agwa ni Lily. Kinahanglan nga magpaduol gyud siya sa dalaga ug kon mahimo, dikitan niya kini pag-ayo.
Dihang nanaygon na sila, sa unang balay nga ilang gidaygunan nianang gabhiona, si Lily ang mikanta sa ‘ Kasadya ning Taknaa.’ Misunod si Gumer nga miawit og Iningles nga ‘Chrismas song’. Dayon nagdungan silag kanta sa laing Iningles nga awit sa Pasko.
Dihay usa ka balay nga ilang giawitan. Wa sila mahibalo nga balay diay kini ni Dimog, nga gibiyaan sa asawa kay mikuyog sa laing lalake. Sa pagkanta nila sa ‘I Saw Mommy Kissing Santa Claus’, mikatol ang kaspa ni Dimog nga nahinumdom sa iyang asawa nga maluibon.
Gilanit ni Dimog ang iyang pinuti nga nagpangidlap sa kahait ug sa isog kaayong tingog mihulbaw, “Hoooyyy! Di ko gustong daygon-daygonan ko ninyo ron, ha! Yawaa mooo! Wa mo kahibawo sa akong problema? Gibiyaan kong Takya!”
Nakita nilang Badok, Gumer ug Cesar nga nanaog si Dimog sa hagdanan nga nagwara-wara sa iyang pinuti ug mihana pagduol kanila. Kalit nga misutoy pagdagan sila si Cesar ug Gumer, biniyaan sila si Badok ug Lily nga wala makalihok, morag giugbok na kandila sa ilang gibarugan.
Unya dihang nahiduol na si Dimog nilang Badok ug Lily mitan-aw siya kang Badok unya namulong, “Uy, ikaw man diay ni Badok! Sus, kaingnon kog kinsa na! Kay kon dili pa ikaw, tigbason gyud tika. O, kinsa man ning imong kuyog? Imo ning uyab?”
“Oo, Noy! Si Lily!” ni Badok nga nakatando nga wala sa hunahuna tungod sa kakalit sa hitabo. Si Lily wala lang pod maggunok kay gibati niya ang tumang kalisang nga nagtan-aw sa pinuti ni Dimog.
“Kining... Badok, hakuti kog tubig ugma. Pun-a ang barel,” ni Dimog nga mibalik sa itaas bitbit ang pinuti. Si Badok diay ang tigkuhag tubig ni Dimog.
Gikan sa itaas nadungog ni Badok ug Lily ang tingog ni Dimog, “Badok, ugma na lang tika hatagig pinaskuhan!”
Sa ila nang pagpamauli namulong si Lily, “Talawana diay nilang Gumer ug Cesar, no, Badok? Gibiyaan man lang ta. Hoy, unsa tong imong giingon nga uyab na ta? Hihihi. Wa pa gani ka mangulitawo nako, uyab dayon?”
“Ugma mamimisita ko sa inyo, ha, Lil!” hinay nga namulong si Badok.
Dihay pahiyom nga nanambo sa mga ngabil sa dalaga. Unya dungan silang mihangad sa langit. Didtoy daghang mga bituon. Unya nabati nila sa halayo ang malimbationg awit sa Pasko nga giawit sa laing manaygunay, “Silent night, holy night. / All is calm, all is bright!” Gikuptan ni Badok ang kamot ni Lily. Wala masuko ang dalaga. (Katapusan)