MAANINDOT ang kampanya sa Cebu City Transportation Office sa pag-clamp sa mga sakyanan nga nag-park sa mga karsada sa tibuok gabii. Usa ni sa mga dakong suliran nga giatubang sa kabomberohan panahon sa pagtubag og alarma sa sunog.
Apan kon ilang gihingusgan kining mao nga kampanya, nganong sa karsada nga dunay daghang violations sa traffic rules ila ra mang tan-awon, sama nianang counterflowing. Kaklaro niana nga kalapasan sa pagmaneho apan, ang CCTO way gibuhat. Ngano man, nahadlok sa political backlash?
Sa pagkatinuod, daghan ang nangalipay adtong dinakpanay sa counterflow sa panahon sa akong higalang si Francisco “Isko” Ouano. Apan unsaon man, gipalab-anan man sa iyang amo nga si kanhi mayor Tomas Osmeña. Laliman kag one month i-impound ang sakyanan? Kinsa man say malipay niana?
Maayo ang mao nga kampanya apan, nalab-anan ra. Suma pang Mayor Edgardo Labella, anti-poor. Sakto kaayo. Kon dakpon, ipatuman kon unsa man ang naa sa balaud, di pasobrahan.
Davao City
Kon nadisiplina sa Dakbayan sa Davao ang mga driver, commuter ug pedestrians, nganong di man sa Dakbayan sa Sugbo? Bisan ang drivers imong pangutan-on, moingon gyud sila nga kuwang og political will ang liderato dinhi.
Hambogero ra ba kaayo ta nga “queen city of the south.” Kaniadto tingali apan, alang nako, di na karon. Nagkagubot ug nagkagidlay kita diri.
Kon ang Davao nakataud og maayog klase nga mga CCTV sa mga karsada ug nakapalit og speed guns, nganong wa man ta niana nga mga gamit diri? Kon ang Davao nakapatuman sa husto sa traffic rules, nganong di man ang Dakbayan sa Sugbo?
Sa Davao City, adto ka lang makasakay sa PUJ stop. Makalabang ka sa pedestrian lanes. Ang dagan sa sakyanan di ka makapatuyang kay naa mayenforcer nga dunay speed guns. Makita ka usab sa CCTV. Mao nga ang mga driver magmatngon og maayo.
Ambot kaha kon duna bay political will kining administrasyong Labella karon? Ang CCTO nag-agad ra sa liderato, kon unsay direksyon ug imando niini.
Disiplina
Usa sa mga paagi aron medyo maluagan ang atoang karsada mao ang pagdisiplina sa mga drayber, commuter ug pedestrians. Kinahanglan nga ipatuman ang traffic rules. Di lang kay tan-awon ang mga malapason. Unya kana sang sakto nga pagpatuman.
Naa man guy pagpatuman nga sobra ra. Sama niadtong driver sa 62C nga PUJ nga gidakop kay nag overloading. Unsaon man pagdeterminar nga overloading kon mao pay pagsulod sa mga pasahero sa PUJ? Wa pa gani makalingkod. Ang di na makalingkod mahimo rang pakanaugon.
Apan kaluoy intawon sa driver gidakop na. Wa pa gani makalingkod ang mga pasahero, overloading na? Nasobraan ra sab ning ubang mananakop.