TUA na si Gazini Ganados, ang Filipina-Palestinian nga tubong Cebu, sa Atlanta, Georgia diin ipahigayon ang Miss Universe 2019 karong Disyembre 8, 2019.
Alang kanako, lisud nga magsunod-sunod sa pag kadaog ang Pilipinas human naangkon ang titulong Miss Universe ni Catriona Gray sa miaging tuig.
Sa una, nakita nako siya nga dunay barog ug unique ang iyang nawong. Aw, isip usa ka produkto og Cebuana nga inahan ug Palestinian nga amahan, di gyud kabentahaan. Apan, niadtong tungura, daw murag dunay kulang.
Ambot sab gyud. Murag di man gud pang pageant winner ang ngalan nga Gazini, nga gikan sa kanhi mall sa mga Gaisano diha dalan Colon nga nasunog. Adto ko mangitag mga baratohon nga mga imit kay di ko maka-afford kaniadto sa branded.
Ang Gazini sab, labi na diha sa shoe department niini, ang among kita-anan kon makig-eyeball sa makaila sa open line (usa ka spin-off sa crossline).
Apan determinado si Gazini nga makadaog, bisan pa man sa mga gwapang mga kandidata nga gikan sa lain-laing dapit sa kalibotan. Sa pagka karon, nakakuha na si Gazini og dakong suporta gikan sa mga Pinoy worldwide diha sa social media.
Usa sa nakapa-impress kanako mao ang iyang tinubagan sa mga pangutana ni Boy Abunda karong bag-o.
Mas duna nay sense ang iyang mga tubag kon itandi kaniadtong nakadaog siya sa Binibining Pilipinas Universe. Samtang giganahan ang uban, alang kanako, murag nagtahitahi lang siyag unsay isulti aron tahay nindot paminawon ang iyang Iningles.
Apan kon imong tarungon sa pag-analyze ang iyang gisulti, wa ray ayo.
Karong bag-o, daw nausab ang akong pag-assess kaniya. Maayo nag tinubagan ug mas dunay finesse ang iyang linihokan. Daw kalit nga ni-mature.
Mao nga makaingon ko karon nga duna siyay dakong chance nga mahimong Miss Universe. Good luck, Gazini Ganados.
Atong abibahan
Gawas kang Gazini, mas mahinungdanon nga atong abibahan ang atong mga atleta nga nangsalmot karon sa ika-30 nga SEA Games.
Importante karon nga atong mahatag ang giingong homecourt advantage. Bisan pa man, ato sab kining balansehon sa atong pag-abi-abi sa atong mga bisita. (@anol_cebu sa Twitter)