JOHN Riel “Quadro Alas” Casimero ang new World Boxing Organization (WBO) 118-pound King human nailog ang bakus dihang gitumba makaduha si former champion South African Zolani “Last Born” Tete sa Arena Birmingham, England, United Kingdom nga gidalit sa Queenberry Promotions ni Frank Warren.
Ang garbo sa Barangay Can-untog, Ormoc City, Leyte og three-division champion (108, 112 ug 118 pounds) nga Casimero unang mitumba sa third round ni Tete gamit ang right hook ngadto sa tampihak.
Giiphan ni referee Steve Gray sa England si Tete, mibarog kini nga daw nakakita sa aninipot. Dihang nagharong pagbalig ang duruha misugat niini ang naghaguros nga left hook ni Casimero busa miligid sa canvas sa ikaduhang higayon si Tete.
Giiphan nasab pagbalik si Tete sa referee, human nakabarug gidabudabohan sa pampatay nga kombinasyon ni Casimero hinungdan nga gihunong na ang away sa oras 2:14 sa round 3.
Nag-una unta sa puntosay sa unang duha ka hugna si kanhi two division champion nga si Tete human gigamit niya ang height advantage dihang tukudtukoran pinaagi sa jab si Casimero.
Ang sobra sa usa ka tuig nga pahuway ni Tete gumikan sa right shoulder injury maoy usa sa hinungdan sa kapildihan niini sa pagtuo nga gitay-an ang abilidad niini.
Ang tulo ka mga boxing judges nga sila si Lisa Giampa (USA), Marcus McDonnell (London) ug Lynne Carter (USA) wala na gamita ang ilang scorecards gumikan sa technical knockout nga kadaugan ni Casimero ang sakop sa Manny Pacquiao (MP) Promotions.
Misaka ang boxing rekord sa boxer ni trainer Nonoy Neri nga si Casimero sa (29-4, 20KO) samtang midahili ang baraha ni Tete sa (28-4, 21KO). Giputol ni Casimero ang 15 ka straight nga daug ni Tete samtang lima ka straight nga knockout win ang gihimo ni Casimero human siya gipukan ni Jonas “Zorro” Sultan pinaagi sa unanimous decision niadtong Septembre 16, 2019.
Migimaw karon ang hungihong nga posibleng unification fight ang sunod ni MP president Sean Gibbons alang ni Casimero batok ni undefeated IBF, Ring Magazine ug WBA Bantamweight champion Japanese “Monster” Naoya Inoue (19-0, 16KO). (Daniel Quindao Guden, US Correspondent)