SUPERBALITA CAGAYAN DE ORO

HIV virus dili babag sa pangandoy

HUMAN sa tulo ka tuig sukad na-diagnose sa Human Immunodeficiency Virus (HIV), dako ang kabag-ohan sa kinabuhi sa usa ka miyembro sa LGBTQ+ apan sukwahi sa uban mas daghang oportunidad ug grasya pa ang nadawat niini.

Gani blessing alang kaniya ang pagka-diagnose niini sa maong sakit niadtong nilabay nga tuig 2016.

Wala gidahom ni David Khalid Arabia, 32, supervisor sa usa ka business process outsourcing company, nga moabot pa niini nga mga tuig ilabi na nga human nagpositibo sa maong sakit buot na niini nga magpakamatay.

Una na niini nga gibutyag nga dili lisod ang pag-inom og mga tambal o medikasiyon apan ang nakapalisod sa mga nagbaton niini nga sakit mao ang diskriminasiyon sa ubang tawo.

Niadtong tuig 2016 nahinabi sa Superbalita Cagayan de Oro si Arabia kinsa bag-ohay palang nga na-diagnose sa maong sakit ug padayong nakigbatok sa gitawag nga "stigma" ilabi na nga dili malikayan ang mga pagtamay ug diskriminasiyon nga nasinati apan suwerteng anaa ang pamilya nga wala nibiya kaniya.

Giangkon niini nga dili sayon ang nasinati apan tungod sa pagsalig ug pagmahal sa iyang pamilya mapasigarbuhong gibatukan niini ang mga diskriminasiyon.

Gikonsidera niining blessing ilabi na nga nakita ang mga tinuod nga nagmahal kaniya bisan paman nga nasayod sa iyang kahimtang ug wala nibiya sa iyang kiliran. Gani nakaila niini ang iyang inspirasiyon karong panahona kinsa maoy treatment partner ug andam nga magsuporta sa iyang mga adbokasiya nga iyang gipasalamatan usab kaayo.

Nagpadayon kini sa pagpakabuhi tungod na usab sa suporta unang-una sa iyang pamilya, mga tinuod nga higala, doktor, HIV International group ug labaw sa tanan ang Ginoo.

Nakuha ni Arabia ang maong sakit sa iyang kanhi hinigugma nga wala nagsaba kaniya nga nagpositibo na kini sa HIV sa tuig 2014 ug nabalhin kaniya ang maong sakit kinsa nahimong uyab ang maong lalaki sulod sa walo ka bulan niadtong tuig 2016.

Human sa tulo ka tuig sa pagbaton niini nga sakit dako ang pasalamat niini sa tanang nagmahal kaniya kay kun dili tungod kanila wala na kini siya karong panahona.

"Before, I really want to end my life because I thought that it’s already the end. Pero mali pala ako. Nilakasan ko ang loob ko at nilabanan ang mga taong iba ang tingin sa mga kagaya ko na HIV positive," matud ni Arabia.

Gipasigarbo usab niini ang nakab-ot karong panahona bisan paman human nakabaton sa maong sakit ug kini tungod sa pagsalig diha sa Labaw nga Makagagahom ilabi na sa paghatag kaniya og dugang kusog lakip na pagpakgang sa dautang plano kaniadto.

"Look at me now, after three years, supervisor na ako. Nagbago ang lahat ng dahil sa sakit na to. Kaya for me, this virus is a blessing to me. Hindi ito naging burden para maabot ko ang mga pangarap ko para sa sarili ko at sa mama at papa ko," dugang pa.

Gi-aghat usab niini ang tanang naghambin sa susama niini nga dili magtago ug mopatim-aw aron nga matabangan ug susama kaniya magpadayon sa pagkinabuhi nga walay diskriminasiyon.

Panawagan niini ngadto sa mga nagbaton sa susama nga sakit nga dili kini ikaulaw ug magtinabangay ug usa lang ang masulti niini sa mga nagbaton og HIV nga dili pa ang kataposan sa tanan.

"One thing is for sure, there’s still life after HIV - it’s really not the end yet!" matud ni Arabia.

"I will be the voice to help tear down the walls of stigma, fear, and shame," dugang pa.

Mipatim-aw kini aron mamahimong tingog sa mga nagbaton niini nga sakit nga dili maulaw ug atubangon kini nga problema tungod kay daghan ang motabang.

Nag-aghat usab kini sa tanan nga dili mawad-an sa paglaom nga duna nay tambal niini nga sakit.

"Just kindly wait patiently for the cure, I know na ang Diyos gumagawa ng paraan pra magkaroon na tayo ng gamot,para matigil na ang sakit na ito and then let's just hold on to that dream," dugang pa.

Ang HIV ug ang Aids hangtod karong mga panahona, wala pa kini tambal apan adunay mga medikasiyon nga maoy makatabang nga kontrahon ang sakit ug mapatas-an pa ang kinabuhi sa mga nagpositibo niining virus ug magpakabuhi nga normal.

Si Arabia ang usa sa nagpamatuod nga "there’s still life after HIV."

Alang sa mga nagbaton niini nga sakit ug sa mga nakasinati og diskriminasiyon ug depresiyon ilabi na sa tagsatagsa ka mga kinabuhi nga angayang himuong sumbanan si Arabia nga bisan paman sa nasinatian pabiling positibo ug mas nagpadayon pa ang pagsalig sa Ginoo.

Ang World Aids Day gihandom matag Disyembre 1 kada tuig sukad sa tuig 1988 aron sa paghatag og awareness aron mapakgang kini nga sakit ug gihandom usab niini ang mga namatay gumikan na usab sa HIV virus.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph