GIKASUBO apan gidayeg sa Philippine National Police (PNP) ang kaisog ni Police Senior Master Sergeant Jason Magno sa Initao Police Station human giprotektahan niini ang mga tinun-an sa Initao College nga dili maangin sa mibusikad nga granada nga gidala sa usa ka lalaki.
Niadtong Biyernes, Nobiyembre 29 ang pamilya ni Magno ang gipasaligan sa kadagkuan nga makadawat og lifetime pension nga mobalor og P600,000 ug uban pa nga mga benipisyo nga haom alang sa pamilya.
Si Police Lieutenant General Archie Francisco Gamboa, ang officer in charge sa Philippine National Police, nagpadangat sa iyang dakong pahasubo.
"The Philippine National Police mourns the death of another hero cop. We give our heartfelt sympathy to the bereaved family of Police Senior Master Sergeant Jason Magno of Initao Police Station in Misamis Oriental. Police Senior Master Sergeant Magno made a supreme sacrifice by covering the grenade with his own body to save innocent civilian lives. He truly lives up to his sworn duty, to serve and protect even if it costs his life," kini ang opisyal nga pahayag sa PNP.
Ila sab gipaabot ang dakong pahasubo ngadto sa pamilya ug ang pamilya nga nabiyaan niini makadawat og death benefit nga P250,000 gikan sa President Social Fund; P141,000 ngadto P181,000 nga Special Financial Assistance (SFA) gikan sa PNP; burial benefit nga P50,000 ug P200,000 gratuity gikan sa National Police Commission (Napolcom).
Isip miyembro kini sa Public Safety Mutual Benefit Fund ang iyang pamilya makadawat og death insurance.
Kini nga benipisyo madawat moabot sa P15,000 matag bulan hangtod sa hangtod ug susamang kantidad nga madawat sulod sa lima ka tuig gikan sa Napolcom.
Sa iyang bahin, si Misamis Oriental Governor Bambi Emano kinsa nagpadangat gihapon sa iyang pahasubo nikonsidera niining bayani.
Andam ang kagamhanan sa Misamis Oriental sa pagtunol sa hinanali nga tabang ngadto sa mga biktima ilabina kadtong naa pa sa mga balay tambalanan.