MOKABAT sa 94 ka mga armas nga gipanag-iyahan sa mga kanhi sakop sa New People's Army ang gipangguba niadtong Huwebes, Nobyembre 28, 2019 sulod sa 4th Infantry Division-Philippine Army (4ID-PA) Gymnasium.
Ang maong mga armas ang gibitbit sa mga walhong grupo nga sagad taga Bukidnon dihang sila nitahan ug mibalik sa gobyerno.
Ang pagbungkag o dimilitarisasyon sa mga armas gipangunahan sa Regional Inter-Agency Task Force on ECLIP (RIATFE) gilangkuban nila ni Department of Interior and Local Government (DILG)-Northern Mindanao director Arnel Agabe; 4ID Commander Nemesio Gacal; Police Regional Office-Northern Mindanao Director Rolando Anduyan.
Ang gobyerno nagpabiling paspas sa kampanya nga matapos na ang insurhensya ug kagubot aron magpadayon ang kahusay ug kalinaw labina sa Mindanao. Subay sa kalihukan gipangunahan sab ni Agabe ang pagtunol og cash assistance nga mobalor sa P2.8 milyon ngadto sa 105 ka mga kanhi rebelde nga mibalik sa gobyerno subay sa programa sa gobernor nga Enhanced Comprehensive Local Integration Program (E-CLIP).
Matud ni Agabe nga dili tanang administrasyon nga mohatag og oportunidad sa walhong grupo nga mosurender hinungdan panahon na kini nila nga mobalik sa sabakan sa gobyerno.
"It is not everyday that rebels who choose to go back to the folds of law will be given such opportunity to redirect their lives through the assistance given to them. Our rebels should know that 'now' is the perfect time to surrender to the government," matud ni Agabe.
Ang kalihukan gitawag nga "Kalinaw sa Amihanang Mindanaw" tungod kay kini ang lugar aron ipakita ang paningkamot sa gobyerno nga seryoso aron makab-ot ang kalinaw sa tibouk Northern Mindanao ug pagpatuman sa Executive 70 nga kamanduan ni Presidente Rodrigo Duterte.