TALIWALA sa mga pagsaway, pagsulting kuwang sa pagpangandam, apan kakurat ug pagbating nasyunalismo ang mihangop sa mga Pinoy nga misud-ong sa pagbukas sa 30th Southeast Asian (SEA) Games sa Philippine Arena, Bulacan, Sabado, Nobyembre 30.
Usa ka grandiyoso nga opening ang nasaksihan sa tanan nga gihimo sa 55,000-seat Philippine Arena nga gitambungan mismo ni Presidente Rodrigo Duterte.
Pormal nga gisugdan ang programa sa pagkanta sa Philippine National Anthem ni Asia's Nightingale, Lani Misalucha.
Mga mitan-aw sa labing una nga indoor opening, mga representante ug bisita sa onse ka nasud sa Southeast Asia sama ni Brunei Sultan Hassanal Bolkiah, ang gitanyagan sa presentasyon sa kultura ug talentong Pinoy.
Hataw sab ang mga performers nga gilangkuban nila Robert Seña, Christian Bautista, Aicelle Santos, KZ Tandingan, Elmo Magalona, Iñigo Pascual ug Apl De Ap.
Mga presentasyon gilangkuban sa mga nasudnong sayaw ug musika gikan sa kundiman, Santacruzan bisan ang ethnic presentation.
Luyo sa mga performers sa nasud, miparada sab ang onse ka mga beauty titlist sa nasud isip muse sa tagsa-tagsa ka delegasyon.
Mas nahugyaw ang tanan sa pagtawag sa mga atleta sa Pilipinas, diin si Miss Universe 2015 Pia Wurtzbach ang nanguna.
Mismong si Presidente Duterte nangunay og abiba sa mga atleta, mikaway-kaway pa kini uban ang pagsayaw nga gikalingaw sa tanan.
Highlight sa opening ang pagpasilaub sa kawa nga anaa giplastar sa New Clark City sa Capas, Tarlac.
Ang pagpasiga gipangunahan sa mga Mindanaons ug garbo sa Pilipinas nga sila si Filipino boxing champ ug Senador Manny Pacquiao ug Filipino women's boxing champ Nesthy Petecio.
Mga Pinoy nga nakalantaw sa programa mipaambit sa social media sa ilang kalipay sa malampusong pagbukas sa biennial meet.
Mahuman ang SEA Games karong Disyembre 11.