PASKO na usab. Sa nanglabay nga mga Pasko, hinapos sa bulan sa Nobyembre daghan na kita og makita nga manglugsong nga atong mga kaigsuonang lumad gikan sa kabukiran ning atong siyudad aron mangayo og pinaskohan sa mga molupyo ning atong dakbayan sa Davao.
Ang atong mga kaigsuonang lumad, sagad tang makita sa atong mga kalsada mag-atang sa mga motorista aron pagpangayo og pinaskohan, hangtud adunay mga higayon nga sila mabondulan sa mga sakyanan ug may mga higayon pa nga inig-uli nila, patay na ang ilang mahal sa kinabuhi pag-abot sa ilang pinuy-anan tungod lang sa pagpangayo og pinaskohan.
Ang uban atong makita nga anaa magtapok sa parking area sa mga Mall ning atong siyudad, apan pipila ra intawon ang itunol nga sensilyo, P3.00, ngadto sa P5.00 ug P10, duna pa’y uban nga akong namatikdan nga dili na mohatag, kasuk-an pa gyud kay lagi mamugos nga dili man unta gibali gikan sa atong gusok kanang kantidara nga atong ihatag sa ila.
Nganong duna may pagpangayo gikan sa hut-ong sa atong katawhan nga mahitabo ning panahon sa Pasko? Asa kini nato gikopya o kaha gisundog? Sa biblikal nga hisgutanan, walay nangayo nga pakatawhon ang usa ka bata nga maoy magluwas o kaha maglukat sa mga kasal-anan sa katawhan sa tibuok kalibutan.
Ang bag-ong testamento sa atong Balaang Kasulatan nga mabasa diha sa Juan Kapitulo 3: Bersikulo 16, nag-ingon “Kay gihigugma sa Diyos ang kalibutan pinaagi niini, iyang gihatag ang iyang bugtong anak nga mao si JesuKristro, aron ang tanan nga mutuo kaniya, dili malaglag kon dili makabaton og kinabuhing walay katapusan”.
Kung atong sumadahon pag-ayo walay nangayo, kon dili, kabubot-on sa Diyos nga iyang gihatag ang iyang bugtong anak aron pagluwas sa katawhan nga naglunang na sa mga kasal-anan sa kalibutan.
Sa ato pa, sa atong mubo nga pagsabot, niining panahon sa pagsaulog sa iyang pagkatawo, walay nangayo kaniya, kung dili kabubot-on sa Diyos nga ihatag siya kanatong katawhan sa kalibutan.
Busa "hatag, ayaw pagpaabot nga pangayuan ka." Bout ipasabot nga kung duna kay ikahatag, ayaw na pagpaabot nga pangayoan ka pa ning panahon sa Pasko.
Dunay uban diha akong namatikdan dili pa manghatag, kasab-an pa gyud dayong sakay sa ilang SUV, hinuon, dili tanan dunay mga datu nga maloloy-on, tawgon pa ang mga lumad ug hatagan bisan og wala nangayo.
Nagpasalamat pod ta kang Mayor Inday Sara Duterte-Carpio, kay sa iya nang panahon wa na’y lumad nga palugsungon dinhi sa siyudad, kung dili ihatud na ang ilang pinaskohan didto sa ilang barangay sa bukid aron didto ihatag ang ilang mga regalo, butang nga atong gikalipay kay wala na’y mga lumad nga magkasakit ug madisgrasya.
Pinaagi niini, pasalamatan ta ang atong mayor sa Davao City.