Station manager sa radyo sa Tacurong nga gipusil, patay na

SULTAN KUDARAT -- Nabugtuan na sa kinabuhi ang usa ka sakop sa media nga gipusil niadtong Oktubre 30 sa Siyudad sa Tacurong.

Pasado alas 3:20 sa kaadlawon, Disyembre 1, nabugtuan sa iyang kinabuhi si Benjie Caballero ang station manager sa Radyo ni Juan sa Tacurong City ug presidente sa Sultan Kudarat Provincial Task Force on Media Security.

Usa ka bulan nga nag-antos si Caballero sa grabe niya nga samad pinusilan sa lawas sulod sa Intensive Care Unit (ICU) sa Saint Louis Hospital sa Tacurong City.

Apan wala na makaya sa biktima ang iyang duha ka samad pinusilan sa baga nga maoy hinungdan sa iyang kamatayon.

Kahinumduman nga samtang nag-atang og traysikol ang biktima atbang sa iyang balay sa Tacurong City kalit lang mibutho ang duha ka wala mailhing tawo ug gipusil siya gamit ang kalibre .45 nga pistola.

Abtik sab nga miikyas ang mga suspetsado sakay sa motorsiklo paingon sa hilit nga dapit sa Tacurong City.

Una na nga gitutukan sa Presidential Task Force on Media and Security nga gipangulohan ni Undersecretary Joel Egco ang imbestigasyon sa pagpamusil kang Caballero.

Nagpaabot dayon og pahasubo ang kinatibuk-ang mga sakop sa media sa Central Mindanao sa kamatayon sa biktima.

Ilubong sab dayon sa pamilya ang patay nga lawas ni Caballero subay sa tradisyong Islam.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph