COTABATO CITY -- Nakalusot na sa ikatulo og labing ulahing pagbasa ang P65 bilyon nga budget alang sa fiscal year 2020 sa Bangsamoro Autonomous Region (BARMM).
Kini human sa makasaysayanong Bangsamoro Parliament Hearing sa Bill 31 o "An Act Appropriating Funds for the Operations of the Bangsamoro Government."
Naaprubahan ang maong kasabutan human sa botohan diin 48 ang mipabor ug usa lamang ang dili uyon.
Lima sab ang nag-abstain sa 54 ka miyembro sa Bangsamoro Parliament nga mitambong sa deleberasyon.
Gikalipay sab ni Bangsamoro Government Interim Chief Minister Ahod Ibrahim ang pagpabor sa kadaghanan sa budget.
Nagpasalamat si Ibrahim sa mga mipabor sa pagsalig nila sa iyang liderato ug iya sab nga nasabtan ang wala miuyon ug nag-abstain sa ngalan sa demokrasya ug Islamic consultation.
Ang naaprubahan nga P65 bilyon dili alang sa pipila ka mga indibidwal apan kini alang sa pag-uswag sa Bangsamoro, dugang ni Ibrahim.