MABINI, Compostela Valley -- Wala pa’y matumbok nga motibo ang kapulisan sa kamatayon sa 70-anyos nga lolo nga gipusil samtang nagpahulay sulod sa iyang panimalay sa Purok Magpalusong, Barangay Cuambog pasado alas 7:00 sa gabii niadtong Sabado, Nobyembre 30, 2019.
Ang biktima giila nga si Loriano Midado, 70-anyos, biyudo ug molupyo sa nahisgutang dapit.
Subay sa report nga nakuha gikan sa Compostela Valley Provincial Police Office nasayran nga ang igsuon sa biktima nga si Rody Midado, midangat sa Mabini Municipal Police Station kinsa mitaho nga ang iyang igsuon gipusil sa wala mailhing suspek.
Base sa inisyal nga imbestigasyon, samtang ang biktima nagpahulay sulod sa iyang balay, usa ka wala mailhing mamumuno ang misulod dayon gihiktan ang mga kamot sa biktima ug gipusil sa makadaghang higayon tumong sa nagkadaiyang parte sa lawas na miresulta sa hinanaling kamatayon.
Human sa gihimong pagpamusil, ang mamumuno daling mikagiw palayo paingon sa wala masayring direksyon.
Narekober gikan sa crime scene ang tulo ka mga basiyo sa bala sa caliber .45 nga armas ug usa ka kabhang nga bala sa samang armas.
Ang patay’ng lawas sa biktima gipahiluna sa Santa Teresa Funeral Parlor.
Padayon ang gihimong imbestigasyon sa Mabini Municipal Police Station sa tinguha nga mailhan ug madakpan ang mikagiw nga mamumuno.