Mga Cebuano nakatampo’g gold medals
NAHILAKIP ang Sugboanong eskrimador nga si Dexler Bolambao sa mga sayo nga nakatampo og gold medals sa Pilipinas kagahapon, Disyembre 1, sa 2019 Southeast Asian Games sa kaulohan.
Ang 23 anyos nga lumolupyo sa Barangay Mambaling, siyudad sa Sugbo maoy labing unang Sugbuanon nga nakabira og gold medal gikan sa arnis event sa matag duha ka mga tuig nga kompetisyon sa Angeles University Foundation gym sa Clark, Pampanga.
Gilupig ni Bolambao ang arnisador sa Myanmar pinaagi sa unanimous decision sa final match sa full contact bantamweight division.
“Para ni sa Cebu,” matod ni Bolambao, kinsa nakat-on sa arnis dihang naa sa second year high school pa lang siya sa Leyte.
Ang arnis, nga usa ka national sport sa Pilipinas, nahilakip sa curriculum sa mga estudyante nga adunay physical education subject.
“Sa MAPEH subject ko nagsugod pagkat-on og arnis. Nalingaw ko sa pagduwa sa arnis hangtod nga ako ning giseryuso. Pagkasunod tuig, nag-apilan nako og tournaments,” matod ni Bolambao.
Ning tuiga lang nahimong regular sport ang arnis sa Seag. Giduwa kini niadtong 2005 nga edisyon isip usa lang ka demonstration sport.
Matod ni Bolambao, nga ang arnis national squad nagtinguha nga makalangkay og pito ngadto sa walo ka gold medals.
Pinaagi sa arnis, si Bolambao nahimong scholar ug nakahuman siya sa kursong BS Mechatronics sa Cebu Technological University.
Pipila ka mga minutos human nakalangkat og gold medal si Bolambao, laing mga Sugboanon, sila si Pearl Marie Cañeda ug Wilbert Aunzo, nakahakot og tulo ka gold medals sa dancesport competition sa Royce Hotel sa Clark, Pampanga.
Ang panagpares nila ni Cañeda ug Aunzo nakadaog og gold medal sa Latin Samba category diin nakatigom sila og 32.450 nga puntos.
Ilang gilupig ang panagpares sa Vietnam nga sila si Uyen Nguyen ug Truong Nguyen (31.950) hasta sila si Lerson Shinawat ug Patoomsriwiroje Preeyanoot (31.800).
Nakadaog na sab og gold medal sila si Cañeda ug Aunzo sa Latin Cha Cha (31.650) ug hasta sa rumba (31.950).
Ang laing Cebuano nga si Andrew Kim Remolino nga nipakita og aksyon kagahapon nakakuha og silver medal gikan sa triathlon event sa Subic Bay.
Si Remolino, kinsa adunay oras nga 1:55:03 nagsunod kang John Chicano, kinsa maoy labing unang nakatunol og gold medal sa Pilipinas.
Gihuman ni Chicano ang 1.5-kilometer swim, 40K bike ug 10K run nga lumba pinaagi sa oras nga 1:53:26.
Nakakuha sab og silver medal ang laing Sugboanon nga si Niño Surban sa mountainbike cross country. Mga alas 5:00 sa hapon kagahapon, ang Pilipinas kasamtangang nag-una sa medal standing nga adunay 14-5-4 gold-silver-bronze medal tally.
Gibiyaan og dako sa Pilipinas ang nagsunod, ang Vietnam nga adunay 3=10=3 medal tally. (RSC, ESL)