NAGPIYESTA ang social media human sa pagbukas sa 30th SouthEast Asian Games (SEAG) sa miaging gabii. Grabing pagdayeg ang gipabuhagay sa netizens sa ilang nasaksihan. Gikan sa pagsugod hangtod sa pagtapos hilabihan kamabulokon sa presentasyon. Way sami. Way bikil. Ang mga sequence sa presentasyon daw usa ka tuig nga gipraktisan. Ang mga suga maayo kaayong pagkahan-ay pahaum sa choreography. Ang fireworks display di matupngan. Ang sayaw ang labing giabibahan. Sa kinatibuk-an nasaksihan sa tibuok kalibutan ang talagsaon nga abilidad sa mga Pinoy. Makadaghan na man ko makasaksi og rehearsal sa mga ginagmay nga production number, ang paghan-ay ug pagtakdo sa matag lihok ibabaw sa intablado di gyud sayon. Unsa na kaha tong presentasyon sa opening sa SEAG. Wa gyuy nakalili sa ilang praktis? Na-busy man gud ta og subay sa mga negatibong report labot sa mga isyu nga nihabol sa maong sports event. Wa ta makabantay nga taliwala sa nilabayay og lapok, may grupo sa mga tawo nga nagpasingot pag-andam sa ilang tagsatagsa ka papel alang sa Nobiyembre 30 nga presentasyon.
Wa nato mailaila ang mga tawo kansang panghunahuna puno sa abilidad sa choreography ug production. Wa lang damha nga taliwala sa mga negatibong isyu, gipakuratan ang nasod sa makabibihag nga presentasyon. Usa ka presentasyon nga nagpakita sa mga Pinoy sa iyang katakus paglingaw sa mga tawo sa ingon niadto nga kalihukan. Di lang mga Pinoy ang nangangha sa talagsaong abilidad apil na ang ubang tawo sa nagkadaiyang suok sa kalibutan. Pagka nindot nga way sama. Sa panultion pa sa mga gagmayng bata “sukol pa ka?” Kapila man ka namilok samtang nagsud-ong sa presentasyon? Karon pa lang gani daghan na ang nangutana nako asa daw sila makapalit og kopya sa SEAG opening. Gusto daw nilang balikbalikon og tan-aw. Ang uban nga wa makakita, gustong mopalit kon naay baligya. Akong giingnan nga naa man sa internet. Ang ilang gusto nga personal nga copy nga ilang malantaw sa tanang higayon. Sama sa mga away ni Sen. Manny Pacquiao ambot may mapalit ba nga kopya diha sa downtown area.
Taliwala sa malampuson nga SEAG opening, gusto nakong ipaabot ang mensahe ngadto sa atong performers, dancers ug choreographers daghan kaayo ta og makat-unan sa SEAG opening. Dinhi sa Sugbo, nahibawo ko nga sama sa akong idol nga naay daghan ang makamao unsaon pag-conceptualize og mga production number. Sama kang Junjit Primor, akong schoolmate kaniadto sa USJ-R. Di na maihap ang production nga siya maoy nagdumala, nga nakahatag sab og garbo natong mga Sugboanon. Gawas kang Junjit, naa pay daghan nga masampit. Di na kinahanglan manawag og taga Manila kon may dakong show nga nagkinahanglan og suheto sa production. Atong huwaton ang opening sa Sinulog 2020 sa sunod buwan kon matakdan ba sa opening sa SEAG. We win as one.