DUHA ka mga butang ang mahibalik sa panahon ni Cebu City Mayor Edgardo Labella. Ang una mao ang pagpaninda sa mga aseras sa Colon Street ug Osmeña Boulevard. Ang ikaduha mao ang street parties atol sa Sinulog Grand Parade.
Naundang ang pagpaninda sa mga aseras sa Colon ug Osmeña Boulevard tungod sa road clearing operations sa siyudad subay sa mando sa Department of Interior and Local Government (DILG) nga hawanan ang tanang kadalanan sa tanang obstructions.
Ang apektadong sidewalk vendors gibalhin didto sa Tabo sa Banay sa P. Gullas Street. Apan gumikan sa hangyo ni Mayor Labella ngadto sa DILG, gitugotan sila nga makabalik sa ilang orihinal nga mga puwesto.
***
Hinuon, temporaryo ra ang pagbalik sa mga sidewalk vendors, sa matag Sabado ug Dominggo ra, gikan sa Disyembre 1 hangtod sa Enero 20 sa sunod tuig. Mora lang ni og pinaskohan sa mayor ug sa DILG ngadto sa mga sidewalk vendors.
Ang ilang pagbalik ubos usab sa usa ka istriktong kondisyon nga di sila makaali sa kadalanan. Pero kon magdasok gani ang mga manindahay sa aseras, ang mga tawo nay molihay ug mosuyla ngadto sa kadalanan.
Dugang maayong balita alang sa apektadong sidewalk vendors sa clearing operations sa siyudad mao nga makadawat silag P20,000 nga financial assistance pinaagi sa Department of Labor and Employment.
***
Gipaundang ni kanhi Cebu City mayor Tomas Osmeña ang street parties atol sa Sinulog. Apan bukas si Labella sa pagpabalik sa street parties basta dunay mga regulasyon ug di kini himuon sa rota sa grand parade ug dunay liquor ban.
Busa dako og posibilidad nga mahibalik ang street parties atol sa Sinulog sa Enero sa sunod tuig. Apan gihimo pa ang mga lagda uban sa Philippine National Police (PNP) aron pagseguro nga kini luwas ug hapsay.
Ang angay lang gyud nga likayan mao ang pagdasok sa katawhan, ilabi na, human sa Sinulog grand parade. Ako mismo nakasaksi nga kon mosuroy ka human sa grand parade, delikado kang mapiit sa lawod sa katawhan. Makasiyagit kag, “Napiit ko senyor.”