MABULUKON ang pag-abli sa 30th Southeast Asian (SEA) Games sa 55,000-seater Philippine Arena sa Bulacan niadtong Sabado, Nobiyembre 30. Bisan kita nga wala sa linawas nga programa apan, pinaagi sa teknolohiya sa Internet diha sa atong mobile gadgets, nakasaksi usab kita ug mapasigarbuhon sa world-class nga pasundayag lakip sa modernong kaayong mga kahimanan ug pasilidad sa paugnat-sa-kusog.
Gibayaw sa kalipay ang mga atleta gikan sa onse ka managsilingang nasod, bisan seguro uban kanato nga wala didto sa venue, dihang si Presidente Rodrigo Duterte nagkanayon nga “I declare the 30th Southeast Asian Game open. Mabuhay kayong lahat!” Dugang usab nakapadasig ang hamubong pakigpulong ni House Speaker Alan Peter Cayetano, chairman sa Philippine Sourtheast Asian Games Organizing Committee (Phisgoc).
Sa kalamposan sa pag-abli sa 30th SEA Games, sama sa nahawngan ang mga negatibong komentaryo sa netizens, kolumnista sa mga matalaan ug komentarista sa radyo nga unang nagsige og pag-ataki sa pagdumala sa Phisgoc ug mga alegasyon bain sa kamahal sa pasilidad, diin nakaani og pagdayeg sa mga bisita tungod sa ultra-modern nga desinyo.
Makasaysayanon ang pag-abli sa 30th SEA Games tungod sa pagpahigayon niini sa unang higayon nga indoor o sulod sa labing dakong arena sa Asya, ang Philippine Arena nga gipanag-iya sa Iglesia ni Kristo nga naa sa Bulacan. Apan ang sentro sa mga duwa didto sa bag-ong world-class sports complex sa Pampanga.
Nakasikad na ang 30th SEA Game. Sulod sa onse ka adlaw gikan niadtong Sabado, maghiusa kita sa pag-isa sa bandila sa Pilipinas. Suportahan nato ang mga atletang Pinoy. Ipatigbabaw nato ang panaghiusa. Hatagan nato og maayong impresyon ang mga bisita sa pag-host sa nasod sa naasoy nga duwa human sa 14 ka tuig. Ihiklin una nato ang pagkanegatibo ug subrang pamulitika labi na sa social media.