MADRID, Spain- Kapin sa 25 mil ka mga delegado gikan sa 200 ka mga nasod sa kalibutan ang magtapok karon sa Madrid, Spain aron tukion ang paghatag og solusyon mahitungod sa epekto sa climate change.
Ang United Nations (UN) Climate Change Conference nga mas nailhan nga COP25 (Conference of Parties) magsugod karong adlawa hangtod sa Disyembre 13 sa Ifema sa Feria de Madrid.
Matod sa UN Framework Convention on Climate Change (UNFCCC) nga sa kasamtangan, mas niinit og 1.1 degrees Celsius ang kalibutan sa pagsugod sa industrial revolution ug kon kini mapasagdan, motaas pa kini ngadto sa 3.4 hangtod 3.9 degrees Celsius.
Kon mahitabo, kini makahatag unya og dakong kadaot nga resulta sa pag-usab sa klima sa kalibutan.
“We have to change course. Countries must work together and commit to more ambitions goals that will allow us to bridge the gap between current commitments and those needed to avoid the rise of temperature above 1.5 degrees Celsius as the science dictates,” matod ni Carolina Schmidt, environment minister gikan sa nasod sa Chile.
Ang Chile mao unta ang host country sa COP 25 apan ang pagpahigayon sa conference gibalhin sa Madrid tungod sa kasamtangang kagubot nga nasinati sa maong nasod.
Niadtong Septiyembre, ang UN nipahigayon og Climate Change Summit sa New York City sa Estados Unidos.
Ang maong kalihukan nga inisyatiba sa secretary general sa UN, nagtutok sa atensyon sa international community sa “climate emergency” sa paspas nga aksyon batok sa epekto nga mamugna sa climate change. (JPP)