GITULIS sa upat ka wala mailhing lalake ang usa ka home depot sa Barangay Poblacion 3 sa siyudad sa Carcar, niadtong Sabado sa kaadlawon, Nobiyembre 30.
Matod ni Police Corporal Argie Noel Espinosa, desk officer sa Carcar City Police Station, nga ang gitulis mao ang Worldwide Home Depot nga nahimutang sa dan P. Nilla, Barangay Poblacion, siyudad sa Carcar.
Pasado ala una sa Sabado sa kaadlawon kalit lang naabot ang upat ka lalake nga luwan sa duha ka motorsiklo ug gitionan dayon ang gwardya nga si Henry Misterio, 48, taga Perilos, Carcar.
Gikuha ang iyang .38 kalibre nga service firearms ug gigapos ang duha niya ka kamot samtang dali nga nanulod ang mga suspek sa maong home depot nga gipanag-iya ni Lesly Ngo.
Nakuha sa mga tulisan ang duha ka lotus grinder nga mobalor sa P12,000, Makita circular saw nga mokantidad sa P9,000 ug lakip na ang kwarta nga P63,619 nga gibutang sa safety vault sa tindahan.
Alas 5:25 na sa buntag, ang usa ka trabahante sa tindahan nga si Arnel Pateres ang miabot ug siya na ang nagbadbad sa gapus sa gwardya ug dali sila nga ni-report sa police station.
Sa pagkutlo ning balita, gisusi na ang kuha sa CCTV camera sa tindahan alang sa pag-ila sa upat ka mga lalake nga tulisan. (AYB)