PIPILA ka biyahe lakip mga pasahero ang apektado sa kanselasyon sa biyahe sa mga barko human wala na tugoti sa Philippine Coast Guard (PCG) 7 ang pipila ka barko nga makabiyahe tungod sa bagyong Tisoy.
Sa giluwatan nga notisya sa PCG 7, kanselado na ang biyahe gikan sa Sugbo ug Bohol paingon sa Samar, Eastern ug Northern Samar, Biliran, Camotes Island, ug Leyte sa Visayas ug Catanduanes, Masbate, Burias, Camarines Sur, Albay, Sorsogon, ug Ticao Island sa Luzon.
Matod sa tigpamaba sa PCG 7 nga si Lieutenant Junior Grade Michael John Encina nga posibleng molungtad og pipila ka adlaw ang maong kanselasyon sa barko tungod kay dugay mogawas sa Philippine Area of Responsibility (PAR) si Tisoy.
Alas 5 sa buntag niadtong Dominggo, Disyembre 1, dihang unang niluwat ang PCG 7 sa maong mga kanselasyon.
Sa Sugbo, wala na pabiyahia ang MV St Camael, MV Ocean Jet 8, ug MV Ocean Jet 11 nga gikan sa Pier 1 sa dakbayan sa Sugbo paingon sa Ormoc, Leyte.
Wa na usab makabiyahe ang MV Melrivic 2 nga gikan sa Polambato, Bogo ug paingon sa Palompon, Leyte.
Biyahe gikan sa isla sa Bantayan nga MBCA Super SM Express ang wala na makabiyahe paingon sa Cadiz, Negros Occidental.
MV Balt Bep Journey nga gikan sa Bantayan Island paingon sa Estancia, Iloilo; LCT Tabuelan Navistar nga biyahe gikan sa Tabuelan sa Sugbo paingon sa Escalante, Negros Occidental.
Kanselado na sab ang biyahe gikan sa Hagnaya sa San Remigio paingon sa Sta. Fe sa Bantayan Island susama sa biyahe sa MV Super Shuttle Ferry 23, LCT Venture 2, MV Super Shuttle Ferry 26, ug LCT Island Venture 5.
Lakip ang MV Starlite Stella Maris nga biyahe gikan sa Pier 4 paingon sa Siargao Island ang kanselado. MBCA Mama Mary nga biyahe sa Ubay, Bohol paingon sa Bato, Leyte; MBCA Leopards ug MV Lady of Charity nga biyahe gikan sa Ubay, Bohol ug paingon sa Hilongos, Leyte. Biyahe gikan sa Pilar, Camotes nga MBCA Junmar 2, MV Junmar 8, ug MV Mika Mari 1 nga paingon sa Ormoc, Leyte.
Ug ang biyahe sa MBCA KCQ gikan sa Bokok via Esperanza, Camotes paingon sa Ormoc Leyte, ug MV Mika Mari 3 gikan sa Consuelo, Camotes paingon sa dakbayan sa Danao.
Sagad sa mga apektado nga biyahero nanguli kay wala nay masakyan. Sa pagkutlo ning balita, wala pa moluwat og listahan sa stranded nga pasahero ang PCG 7. (HBL)