SUPERBALITA CEBU

Krus, imahen ni Sr. Sto. Niño molibot; 500 days countdown

ATOL sa paglusad sa 500 days countdown kagahapon, Dominggo, Disyembre 1, alang sa ika-500 nga kasumaran sa pagbunyag sa unang Kristiyano sa Sugbo karong Abril 14, 2021, usa ka Tindalo Cross o replica sa krus ni Magellan ug imahen sa Señor Sto. Niño gibendisyonan ug nagsugod sa paglibot sa 500 ka mga parokya sa tibuok nasod.

Si Cebu Archbishop Jose Palma maoy nangulo sa misa sa Cebu Metropolitan Cathedral ug ang seremonya sa pagbendisyon sa krus ug imahen sa Sto. Niño.

Karong adlawa, Disyembre 2, ang Tindalo Cross ug imahen sa Sto. Niño unang molibot sa mga pinili nga parokya sa Sugbo gikan sa Cathedral ug mopadayon sa ubang bahin sa Kabisay-an, Luzon ug Mindanao.

“Next year, daghan jubilee. Ang atong pagsaulog nga malipayon niining mahinungdanon nga nahitabo (sa kasaysayan). (Dunay) programa sa , lain-laing profession, agency nga masayran nato...” tipik sa wali ni Palma, uban sa pagpasabot sa personal nga jubilee isip artist, musicians, doctors ug ubang professionals.

Samtang, si Palma nagkanayon nga gawas sa krus ug imahen sa batang Hesus, daghang kalihokan nga giandam sa matag parokya labina dinhi sa Sugbo, diin nagsugod ang Kristiyanismo pinaagi sa pagbunyag sa unang lumad nga Sugbuanon.

Dugang ni Palma nga daghan pa ang masayran sa maong selebrasyon sa unang bunyag aron pahinumdoman ug mapahigayon.

Samtang, nitambong sa misa kagahapon sila si Cebu City Mayor Edgar Labella ug Vice Mayor Mike Rama uban sa pipila mga lider sa pulitika, sektor sa pamatigayon ug mga lider simbahan.

Gitambongan usab kini sa dili mominos 2,500 ka mga debotos atol sa prosesyon gikan sa Magellan’s Cross sa Plaza Sugbo padulong sa Cathedral diin gihimo ang misa.

Usa ka dakong countdown clock ang gimontar sa Magellan’s Cross alang sa countdown.

Ang Tindalo Cross ug imahen sa Sto. Niño mabalik sa Sugbo tukma sa ika-500 nga anibersaryo sa pag-abot ni Ferdinand Magellan sa Sugbo niadtong Marso 16, 2021. (JCT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph