SUPERBALITA CEBU

Cebu province way klase

HALAPAD ang nasakop nga mga dapit nga maapektohan sa bagyong 'Tisoy.'

Base sa advisory sa Philippine Atmospheric, Geophysical, and Astronomical Services Administration (Pagasa) kagahapon, Dominggo, Disyembre 1, sa alas 5:00 sa hapon, ang sentro sa bagyo naa sa sidlakan sa Virac, Catanduanes.

Aduna kini gikusgon sa hangin hangtod sa 140 kilometer per hour (kph) ug huros hangtod sa 170 kph.

Nag-irog kini paingon sa kasadpan nga adunay gikusgon nga 25 kph.

Nakasinati og signal no. 1 ang amihanang bahin sa Sugbo sama sa Asturias, Bantayan, Bogo City, Borbon, Carmen, Catmon, Daanbantayan, Danao City, Madridejos, Medellin, Pilar, Poro, San Francisco, San Remigio, Santa Fe, Sogod, Tabogon, Tabuelan, Tuburan, ug Tudela sa Camotes Island.

Lakip sa signal no. 1 ang Metro Cebu ngadto sa habagatan sa dakbayan sa Carcar.

Si Provincial Disaster Risk Reduction and Management Office (PDRRMO) chief Neil Angelo Sanchez niingon nga si Gov. Gwendolyn Garcia nideklarar sa pagsuspenso sa klase sa preschool ug elementary levels sa maong mga dapit aron paglikay sa posible nga trahedya.

"But it would also be helpful if the residents themselves will initiate and voluntarily evacuate to help our local DRRM," matod ni Sanchez.

Ang PDRRMO nag-monitor na sa coastlines ug low-lying areas sukad niadtong Sabado, Noiyembre 30.

Si Sanchez nidugang nga ang gobernador mopatawag karon sa disaster response cluster alang sa malangkubon na pagpangandam.

Ang cluster gilangkoban sa PDRRMO, Provincial Health Office, Provincial Social Welfare and Development Office, Philippine Coast Guard, Cebu Provincial Police Office, Philippine Red Cross Cebu Chapter ug Pagasa.

Apan atol ning pagsuwat, si Cebu City Mayor Edgardo Labella nagdumili sa pagluwat og suspensiyon sa klase.

Sumala sa SunStar Cebu, karong adlawa, Disyembre 2, moluwat og pahibalo ang mayor.

Samtang, matod ni Engr. Alfredo Quiblat, Jr., OIC sa Pagasa Visayas, “Ang ulan light to moderate dili ra mag-expect nga kusog kaayo nga ulan kay ang concentration naa sa Southern Luzon ug Central Luzon.”

Dugang niya nga makasinati og hinay hangtod sa kasarangan nga ulan apan 30 hangtod sa 60 kph nga kusog nga hangin ang masinati sa amihanang bahin sa Sugbo.

Ang kusog nga hangin igo kining makatumba og punuan sa saging, sa sanga sa dagkong punuan, mga poste nga dili lig-on, ug makapalid sa atop sa balay nga gama lang sa light materials.

”Tungod sa kakusog sa hangin ginadili na ang paglawig gikan sa Danao padung sa tumoy,” sigon ni Quiblat.

Si Tisoy gibanabana nga mo-landfall karon, Lunes, Disyembre 2, sa gabii o sa buntag sa Martes, Disyembre 3.

Giisa sab ngadto sa Signal No. 2 sa Catanduanes, Northern Samar ug Eastern Samar.

Gawas sa dakong bahin sa Sugbo, signal no. 1 sab ang Quezon lakip na ang Polillo Island, Camarines Norte, Camarines Sur, Albay, Sorsogon, Masbate, Burias, Ticao Island, Marinduque, Romblon, Aklan, Capiz, Northern Iloilo (Ajuy, Anilao, Balasan, Banate, Barotac Viejo, Batad, Bingawan, Calinog, Carles, Concepcion, Dingle, Duenas, Estancia, Lambunao, Lemery, Passi City, San Dionisio, San Enrique, San Rafael, Sara), Northern Antique (Culasi, Libertad, Pandan, Sebaste, Tibiao), Northern Negros Occidental (Cadiz City, Calatrava, Enrique B. Magalona, Escalante City, Manapla, Sagay City, Silay City, Toboso, Victorias City), Samar, Biliran, Leyte, Southern Leyte ug Dinagat Island. (RTF)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph