LABING minos 26 ka mga pasahero nangaangol, lima niini kritikal, human malimbuwad ang usa ka mini bus sa sityo Sandayong, Barangay Liki, lungsod sa Sogod, amihanang Sugbo mga alas 2:30 sa kaadlawon, Disyembre 2, 2019.
Ang San Sebastian mini bus (GEU 315) giingong nawad-an og brake samtang nagdulhog sa likuon ug dulhogon nga karsada samtang nagsunod sa Auto bus.
Nadumbolan sa mini bus ang lubot sa Auto bus samtang nagsige og maneho ang driver niini nga si Edgar Atendido nga di sila mahug sa pangpang hinungdan sa pagkalimbuwad sa San Sebastian mini bus.
Ang lima nga kritikal giingong nakaangkon og mga bali sa lawas. Ang duha ka mga sakyanan puro padung sa Dakbayan sa Sugbo.
Matod ni Police Staff Sergeant Raffe Tejares nga nag-una ang Auto bus sa San Sebastian bus samtang nagdulhog sa lungsongon nga karsada.
Puro kusog ang dagan sa duha ka mga sakyanan dihang kalit lang nawad-an sa preno ang mini bus.
Matod ni Tejares nga gipaninguha ni Atendido nga di sila mapunta sa walang bahin sa karsada diin didto ang pangpang.
Sa iyang pagpaninguha, iyang nadumbolan ang lubot sa Auto bus hinungdan sa diretsong pagkalimbuwad niini.
Ang 26 ka mga pasaherong angol daling gidala sa Juan Dosado Memorial Hospital apan, ang lima nga kritikal ang kahimtang gibalhin sa tambalanan sa Dakbayan sa Sugbo.
Ang ubang mga pasahero nga menor rag mga kadaut nakagawas ra dayon sa tambalanan.
Si Atendido nga gamay ra og kadaut sa aksidente gitanggong sa Sogod Police Station samtang magpaabot sa kasong ipasaka batok kaniya.