LAHI sa mga nangagi, emosyonal ang SAC-SMB All Cebu Sports Award niadtong Huwebes sa gabii sa Casino Espanol.

Malipayon ug mapasigarbuhon ang mga atleta nga midawat sa ilang mga pasidungog niadtong gabhiona, apan ang presensiya ni Z “The Dream” Gorres (kansang masilakong boxing career kalit lang nalusno ug napakgang) maoy nahimong sentro sa atraksiyon sa maong kagabhion.

"The Manny Pacquiao Blog". Click here for stories and updates on the Filipino boxing champ.

Wa kalikayi, misugod paglugmaw ang mga luha gikan mga mata sa pipila ka mga nagpalibot dihang gipakita ni Butchoy Gorres ang iyang tinguha nga makabarog siya gikan sa wheel-chair nga iyang gilingkuran aron pagdawat sa iyang pasidungog – ang Presidential Award.

Inabagan sa iyang asawa nga si Datchess ug ingon man sa boxing patron sa Sugbo nga si Antonio L. Aldeguer, si Butchoy, bisan pa sa tukmang kalisod, nakahimo sa pagtikang sa iyang mga tiil paduol sa stage, maya ug mapasigarbuhon nga midawat sa award nga gidungangan sa malanog ug kinasingkasing nga palakpak gikan sa nga nagpalibot.

Dili kay pipila lang, kon dili ang tanan gayud nga didto niadtong gabhiona ang mipakita og igong sempatiya ngadto ni Gorres, kansang panagway tataw kaayong naghubid sa kinailadman ug tinud-anay niyang pagbati – ang kalipay nga di gyud matukib.

Sayod si Gorres nga taliwala sa nahitabo kaniya, wa siya biyai sa mga batid niyang tigpaluyo. Sayod siya, nga ning panahon sa iyang panginahanglan, anaa gihapon nagpalibot ug hinuon misamot pagdunol sa ilang suporta ngadto kaniya.

Kini maoy butang nga nagpalig-on ug naghatag kaniya sa saktong determinasyon bisan pa man ning trahedya nga iyang nahiaguman.

Mitidlom ang kasaba, ug mibalik ang kahilom sa hawanan sa dihang misugod na sa iyang pamulong si Sir Tony Aldeguer, ang tawo nga nagmatuto ni Gorres sukad pa niadtong 9 anyos pa kini.

Kon pila ka minutos ang pagbarog, pagsaysay ug pagbatbat ni Sir Tony ibabaw sa stage, mao usab kini ang gidugayon sa kahilom sa palibot nga daw sa ang tanan nahisama sa kandila na natiurok nga naminaw sa emosyonal niyang pamulong.

Gisaysay ni Sir Tony ang pagsilak sa boxing career ni Gorres ug hangtod na sa kalit nga pagkasukamod niini.

Apan sa katapusan iyang gipasumbingay ug gitumbok ang kaisog, ang lig-ong determinasyon sa usa ka atleta aron lang kini maglampuson.

Di man tuod sa natad sa pamoksing, di man tuod sa sport nga iyang gihigugma apan nagmalampuson gihapon si Gorres sa iyang pagpakig-away batok sa naghudlat sa iyang kinabuhi. Sulod sa pipila ka buwan nga pagpakigbugno, si Butchoy malipayon ra gihapon nga miuli ug mihangop sa iyang asawa ug anak.

“He’s my real champion. He’s your champion. He’s our champion,”panapos ni Aldeguer nga ning higayona gidunganan na usab sa malanog nga mga pakpak.

(junmigs0622@yahoo.com)