Northern Cebu gipaubos sa Signal No. 2

GIPAUBOS na ngadto sa Signal no. 2 ang amihanang bahin sa Sugbo samtang anaa sa Signal no. 1 ang Metro Cebu subay gihapon niining Bagyong Tisoy.

Samtang niabot na sa 74 ka mga biyahe sa barko ang gikanselar sugod niadtong Dominggo sa alas 5 sa buntag hangtod Lunes, Disyembre 2.

Niabot na usab sa 468 ka mga pasahero ang natala nga stranded tungod sa maong bagyo.

Ang Philippine Atmospheric, Geophysical and Astronomical Services Administration (Pagasa) nipaubos na sa Northern Cebu sa Signal no. 2 alas 2 sa hapon, Lunes.

Naglakip kini sa Daanbantayan, Bantayan, Madridejos, Santa Fe, Medellin, Bogo City, San Remigio, Tabogon, Tabuelan, Tuburan, Carmen Borbon, Sogod, Catmon, Asturias, ug Camotes Islands.

Samtang nagpabilin sa Signal no. 1 ang Metro Cebu diin naglakip kini sa Balamban, Toledo City, Pinamungahan, Aloguinsan, Naga City, Talisay City, Cordova, Minglanilla, Lapu-Lapu City, Mandaue City, Cebu City, Consolacion, Liloan, Compostela, and Danao City.

Sa alas 2 sa hapon nga severe weather bulletin sa Pagasa, Lunes, Disyembre 2, nasigpatan ang mata sa bayo sa 195 kilometros sidlakan sa Juban, Sorsogon.

Nagdala gihapon kini og hangin nga 150 kilometros ang takna ug pag-unos nga 185 kilometros ang takna.

Nagdagan ang maong bagyo sa 20 kilometros ang takna sa direksyon sa kasadpan.

Sa forecast usab sa Pagasa, possible nga ni- landfall na ang maong bagyo sa Catanduanes, Albay, o Sorsogon karong gabii o kaha sayo sa buntag ugma.

Matod ni Jomar Eclarino, weather specialist sa Pagasa Mactan, nga giisa na ang yellow heavy rainfall sa Northern Cebu.

Masinati sa mga dapit sa amihanan ang kusog nga uwan diin delikado ang pagbaha.

Anaa sa 7.5 millimeters ngadto sa 15 mm nga pag- uwan ang masinati.

Samtang sa datus sa Philippine Coast Guard (PCG) 7 niabot na sa 74 ka biyahe sa barko ang wala na pabiyahea gikan sa Sugbo ug Bohol.

Aduna'y natala ang PCG 7 og 468 ka mga pasahero nga stranded.

Lakip sa wala na makabiyahe ang 78 ka rolling cargoes, 71 ka passenger vessels, ug 45 ka motorbancas.

Matod sa PCG 7 pinaagi sa tigpamaba niini nga si Lieutenant Junior Grade Michael John Encina, nga ang biyahe gikan sa Santander sa habagatang Sugbo paingon sa Sibulan mao lang ang gitugutan nila nga makalawig.

Gitambagan ang mga local government units (LGUs) nga i-alerto ang disaster units niini alang sa possible nga pagbaha ug pagdahili sa yuta. (Superbalita Cebu)