SAYO kaayong miarangkada ang host Philippines sa pagsugod sa 30th Southeast Asian Games niadtong Dominggo, Disyembre 1, 2019.
Tiaw mo bay sa una pa lang adlaw sa matag duha ka tuig nga sporting competition sa Southeast Asian nations, ang Pilipinas mikamada gilayon og 23 ka gold medals.
Kagahapon, Disyembre 2, miabot na kini og 32, 15 ka silver ug siyam ka bronze nga mosumada ngadto sa 56 ka medalya tanan.
Ning sayong bahin, mihayaghayag na man tuod ang pangagpas sa atong mga sports leaders nga makuha ang overall champion, pero di pa sab gyud ta ka siguro kay ang daghang medalya nga mahagdaw anaa man sa swimming ug athletics.
Sa swimming ra ba, taodtaod na nga naputol ang atong dominasyon sama sa gibuhat nila ni Eric Buhain (1991) ug Aikiko Thomson (1987-1991).
Katapusan ta nga naka-gold sa swimming 2009 didto sa Laos diin ang nakalabni ta og upat ka gold medal, kortesiya nila ni Daniel Coakley sa 50m freestyle, Ryan Arabejo sa 1,500 meter freestyle, Miguel Molina sa meter ug sa 400m individual medley. Apil niini ang unom ka silver ug usa ka bronze.
Sukad niadto wala na tay kisaw nga nadunggan.
Sa athletics, ang presidente sa Philippine Athletics Track and Field Association (Patafa) nga si Philip Ella Juico misaad og unom ka gold medal.
Mangulo niini mao si EJ Obiena ug Nathalie Uy sa pole vault. Posibli pa gani nilang haruson ang tanang events.
Karong Disyembre 6-10 pa ipahigayon ang athletic events didto sa New Clark City Athletic Stadium.
Anaa pud ang mga beteranong sila si Eric Gray ug Fil-Am Carter Lily sa men’s 800 meter run, William Morrison sa men’s shotput ug Kristina Knott sa women’s century dash.
Mao ni nakapabor sa host, kay makapili og unsay mga events nga unahon sa pagduwa nga makahatag og igong moral sa kaugalingong atleta.
Posibli nga kadtong maanindot nga pasundayag sa opening ceremony nakatampo og gamayng kadasig sa atong mga atleta kinsa sa sayo pa daw og sa naapektohan sa mga kontrobersiya nga migimaw.
Pang world class gyud ang maong pasundayag nga gani ang Asian Olympic Committee miagni sa Pilipinas nga maoy mo-host sa Asian Games sa 2030.
Bitaw, kon maghiusa lang ta nganong di man. Aduna na tay pasilidad nga dili nato ikauwaw. Kadtong mga lapses nga atong nasinati mao toy maghatag og leksiyon nga dali ra kaayo kining makorehian.
•••
Niadtong Dominggo gihapon, daw og sa natabonan sa opening ceremony sa SEA Games ang away ni Johnreil Casimero kinsa, sa wala damha, milangkat sa titulo sa inilang WBO bantamweight champion nga si Zolani Tete sa Sout Africa.
Wa mahisguti ang iyang away kon wala pa siya ma-champion. Kini tungod kay didto man ipahigayon sa Arena Birmingham sa England, ang dapit diin nagbase ang iyang kontra.
Human sa iyang impresibong kadaugan, gihagit karon ni Casimero si Naoya “Monster” Inoue, ang Japanese superstar nga mipukan ni Nonito Donaire Jr. sa ilang unification fight sa niaging buwan. Posibli kining mahitabo sunod tuig.
Moaway pa usab sila si Jerwin Ancajas ug Jhack Tepora sa dili pa motapos karong tuiga.
Si Tepora, kon way kausaban makigsangka ni Chris Avalos karong Disyembre 21 didto sa Toyota Arena, Ontario sa California samtang si Ancajas modepensa sa iyang IBF world super flyweight title batok ni Miguel Gonzalez didto Puebla Mexico.
Ang kalampusan ni Ancajas ug Tepora maoy hingpit nga magtuldok og maayong timaan sa Philippine Sports sa tuig 2019. Goodluck! (jun.migallen22@gmail.com)