GILANGKAT sa Tuburan ang duha ka kampiyonato sa 2019 Congressman PJ Cup basketball and volleyball tournament nga natapos niadtong Sabado, Nobiyembre 30, sa Pinamungajan Sports Complex human nila tagsatagsang gipanglupig ang Balamban sa championship game sa duha ka events.
Sa volleyball, miagi una og dakong pagpanghudlat ang Tuburan una pa sila makalingkawas sa dakong rally sa Balamban, 3-2.
Sa sinugdanan daw og nagsubay sa sayon nga kadaugan ang Tuburan human kini makaposte og 2-0 nga labaw sa unang duha ka sets.
Apan sa wala damha, ang Balamban nakagukod sa dihang mibawos usab kini og pupo sa ikatulo ug ikaupat nga set nga maoy nakapatabla, 2-2.
Makapaikbi sa atay ang nasaksihan sa ikalimang set human nagpuli-puli og sakmit sa labaw ang matag habig.
Human nagtabla sa 12-12, ang duha ka sipyat sa service sa Balamban sa crucial nga mga segundos maoy naghatag og kahigayonan nga maselyo sa Tuburan ang kadaugan.
Sa basketball, saktong dominasyon maoy gipakita usab sa Tuburan, 109-81.
Gikan pa lang sa sinugdanan, ang Tuburan mipakita dayon sa saktong labok ubos sa pagpangulo ni Jessie Cris Bayo.
Ang kapitan sa barangay Mag-alwa mipakatap og 35 puntos aron pangulohan ang Tuburan sa kadaugan nga wala makaagi og kalisdanan.
Ang Toledo City mao usab ang misakmit sa third place honor sa volleyball human mabuntog ang Pinamungajan, 3-1. Gilangkat usab sa Barili ang ikatulong dapit sa basketball pinaagi sa pagpukan sa Toledo City, 85-70.
Subay niini, mapasalamaton kaayo si Congressman Pablo John Garcia sa tanang mga lungsod sa ikatulong distrito tungod sa hugot nilang pag-itsa sa ilang koperasyon.
Ang lega gituyo aron sa paghiusa ug pagpalig-on sa relasyon ug kamarederya sa mga elected officials sa nahisgutang distrito. Ang awarding ceremonies ipahigayon sa sunod semana sa dapit nga ipahibawo na lang unya. (JBM)