NASAGMUYO na si World Boxing Organization (WBO) welterweight champion Terrence Crawford (35-0, 26 KOs) nga hangtod karon, wala gihapo’y klaro kon matuman ba ang iyang pangandoy nga makakontra og dagkong mga pangalan sa kalibutan sa boksing sama ni Filipino boxing legend Manny Pacquiao.
Si Crawford nakatakdang mobalik og away karong Disyembre 14 sa Madison Square Garden sa New York apan batok sa dili ilado ug usa ka dakong underdog nga si Egidijus Kavaliauskas.
Ang nakitang problema mao ang pagkahilambigit ni Crawford sa Top Rank Promotions nga adunay eksklusibong kontrata sa ESPN.
Ang kadaghanan sa dagkong mga pangalan sa timbang ni Crawford naa sa Premier Boxing Champions, nga adunay kontrata sa Showtime ug Fox Sports.
Si Pacquiao, kinsa maoy welterweight champion sa World Boxing Association (WBA) welterweight division, lakip na sila si International Boxing Federation (IBF) ug World Boxing Council (WBC) king Errol Spence, Danny Garcia, Keith Thurman, Shawn Porter, ug uban pa pulos sakop sa PBC.
“It’s frustrating but I look at it as a business move by them not to fight me,” matod ni Crawford sa interbyu sa The Los Angeles Times nga napatik sa www.boxingscene.com.
Ang labing dako gyud untang away alang kang Crawford mao ang unification bout batok kang Pacquiao o Spence apan hanap pa kini sa diyes panas.
“I don’t know if that fight will ever happen,” matod ni Crawford.
Hinuon alang kang Crawford, dili na lang kini niya hunahunaon og maayo gumikan kay alang kaniya, siya ang labing maayong boksidor sa kalibutan ning panahuna. (ESL)