SA PAGSUGOD sa kuwaresma ug lahos na sa kasaulogan sa pagbalaan sa mga adlaw sa Semana Santa, kanunay nga namalandong si Rico. Gilab-as niya kanunay sa iyang kaisipan ang mga pag-antos, pagpakasakit ug pagpakamatay ni Ginuong Hesus pinaagi sa pagpalansang sa krus didto sa Kalbaryo aron pagtubos sa mga sala sa katawhan. Ug kanunay nga nanaginting sa iyang alimpatakan ang wali sa mga pari kon unsay angay nga buhaton sa pagsugod sa kuwaresma, lahos na sa mga mahal nga adlaw nga naglangkob sa kuwarenta ka mga adlaw.
“Pagpuasa kamo. Panghatag o panglimos kamo isip buhat sa kaluoy. Pag-ampo kamo!” Kini ang tulo ka tulumanon nga giawhag ug gidasig sa mga pari ngadto sa katawhan matag wali nila kada adlaw sa santos nga misa sa simbahan. Ug nakapmalandong si Rico. Mituhop sa iyang kasingkasing ang tulo ka tulumanon nga kanunayng giwali sa mga pari nga angay buhaton atol sa kasaulogan sa kuwaresma, lahos na sa mga adlaw sa Semana Santa.
“Di ta mokaon og karneng baboy ug ubang matang sa karne matag Biyernes. Busa, ayaw kamo pagluto sa maong lamiang putahe. Magpuasa ta!” pasidaan ni Rico sa iyang duha ka suluguong babaye. Gipasabot sab niya ang iyang asawa ug duha ka anak nga lalake ug babaye.
“Di lang kay magpuasa sa lamiang pagkaon, magpuasa o magkontrol sab ta sa dautang bisyo,” dugang pasabot ni Rico ngadto sa iyang asawa nga hilig manugal sa Casino, ug ngadto sa duha niya ka anak nga hilig makigbarkada ug magdisko uban sa ilang mga higala.
Ninghatag sab si Rico og hinabang sa iyang mga silingan sa eskuwater ug sa mga makililimos diha sa kadalanan ug sa simbahan.
“Mopaambit sab ta sa mga grasya nga atong naangkon tungod sa paglambo sa atong negusyo nga apartment, pension house ug condominium ngadto sa mga kabos.” Gipasabot dinhi ni Rico sa iyang asawa ug mga anak nga buhat kini niya sa kaluoy sa iyang isigka tawo.
Sa sulod sa ‘prayer room’ sa simbahan kanunay sab nga giampo ni Rico uban sa iyang asawa ug mga anak, ang kabulahanan sa katawhan, ilabi na sa iyang mga kontra partido sa pulitika nga hilabihang modaot sa iyang dungog ug mosablig og lapok sa iyang pagka tawo; nga unta makapamalandong pod silang tanan sa tulo ka tulumanon nga angayng buhaton aron kitang tanan mahiusa sa Diyos, di lamang sa pagsugod o sulod sa kuwaresma ug sa kasaulogan sa Semana Santa, kundili sa tanang adlaw sa atong kinabuhi hangtod sa kahangturan. (Katapusan)